Pravaabaroncy zaklikali nakiroŭvać na imia hienprakurora Biełarusi Alaksandra Kaniuka listy z patrabavańniem nieadkładna vyzvalić apazycyjnaha palityka Paŭła Sieviarynca, piša «Radyjo Svaboda».
«Z dakładnych krynic nam stała viadoma pra žorstkaje abychodžańnie pad vartaj ź vieteranam biełaruskaj apazycyi Paŭłam Sieviaryncam, jakoha aryštavali 7 červienia. Pavał Sieviaryniec — viazień sumleńnia, jakoha varta nieadkładna vyzvalić biez usialakich umoŭ, a da taho času harantavać jaho biaśpieku i niedatykalnaść», — zajaviła pravaabarončaja arhanizacyja Amnesty International.
Sieviaryniec byŭ zatrymany 7 červienia kala svajho doma paśla taho, jak pravioŭ na płoščy pierad Kamaroŭskim rynkam u Miensku «narodny pikiet svabody i salidarnaści» pobač ź pikietami pa zbory podpisaŭ za vyłučeńnie alternatyŭnych Alaksandru Łukašenku kandydataŭ u prezydenty.
Sud Frunzienskaha rajona Mienska aryštavaŭ jaho na 15 sutak za ŭdzieł u adnym z papiarednich pieradvybarnych pikietaŭ. Paźniej Sieviaryncu byli pryznačanyja administracyjnyja aryšty za ŭdzieł u inšych akcyjach. U vyniku niekalkich sudovych pasiedžańniaŭ Sieviaryniec atrymaŭ sumarna 90 sutak aryštu.
Pavodle Amnesty International, «u adkaz na biesprecedentnuju mabilizacyju apazycyi i akcyi pratestu suprać prezydenta Alaksandra Łukašenki pa ŭsioj Biełarusi ŭłady razharnuli biaźlitasnuju kampaniju pa ačarnieńni i zatrymańniu asnoŭnych kandydataŭ u prezydenty pa sfabrykavanych abvinavačvańniach».
Amnesty International zaklikała ŭłady Biełarusi «nieadkładna spynić eskalacyju atak na pravy čałavieka, vyzvalić usich, kaho ŭtrymlivajuć pad vartaj vyklučna za mirnaje karystańnie pravami, a taksama pryciahnuć da adkaznaści ŭsich vinavatych u parušeńniach pravoŭ čałavieka».
