Baćka zapłaciŭ 4,99 funta (kala 6 dalaraŭ) za anłajn-hulniu dla 11-hadovaj dački, a praź miesiac atrymaŭ rachunak na tysiačy funtaŭ, piša bbc.com.
72-hadovy Styŭ Kaminh ź Vialikabrytanii raspavioŭ, što dazvoliŭ dačce raspłacicca svajoj kartkaj z kampanijaj Roblox. I heta byŭ razavy płaciož.
Roblox — kalektyŭnaja anłajn-hulnia, jakaja naličvaje kala 100 miljonaŭ karystalnikaŭ pa ŭsim śviecie.
Jana asabliva papularna siarod dziaciej. Jaje možna spampavać biaspłatna, ale padčas hulni ŭdzielniki mohuć vydatkoŭvać hrošy.
Styŭ Kaminh rastłumačyŭ BBC, što jaho 11-hadovaja dačka nie razumieła realny stan rečaŭ, kali hulała ŭ Roblox padčas karancinu.
«Dačka skazała, što ŭsie jaje siabry hulajuć u hetuju hulniu. Jana chacieła vydatkavać 4,99 funta, — raspavioŭ jon. — 16 krasavika jana raźličyłasia majoj kartkaj. A paśla hetaha ja i zabyŭsia pra hetuju hulniu».
Padčas pandemii Styŭ vyrašyŭ zarehistravacca ŭ sistemie internet-banka.
Kali jon upieršyniu zajšoŭ na svaju staronku, to byŭ šakavany. Amal praź miesiac paśla pieršaha płaciažu jon straciŭ 4 642 funtaŭ (5 800 dalaraŭ), rachunak byŭ u minusie.
«Ja byŭ uražany, ubačyŭšy sotni i sotni asobnych tranzakcyj. Usio ŭ sumie ad 0,99 da 9,99 funta. Ja ničoha nie moh zrazumieć».
Jon patelefanavaŭ u svoj bank, kab anulavać kartu. Ale niahledziačy na heta, ź jaho kartki źniali jašče kala tysiačy funtaŭ praz dadatak Google Play, raspaviadaje jon.
«Maja dačka dumała, što mieła spravu ź niesapraŭdnymi hrašyma. Jak možna dazvalać kampanijam stavić pastki dla niepaŭnaletnich u takich hulniach?» — aburajecca jon.
Styŭ Kaminh pryznaje, što nie čytaŭ umovy prodažu, kali dazvoliŭ dačce zrabić płaciož dla Roblox.
Ale jon uražany tym, što ŭ dziciačaj hulni možna vydatkavać tysiačy funtaŭ i zrabić tysiaču tranzakcyj tolki za niekalki tydniaŭ.
«My imkniomsia praduchilić niesankcyjanavanyja vytraty i pracujem niepasredna z baćkami, kab zabiaśpiečyć adpaviednuju kampiensacyju, kali heta mahčyma, — rastłumačyli BBC ŭ Roblox. — My taksama rekamiendujem baćkam prahladać nałady apłaty pasłuh, naprykład, praz servis Google Play. Jany mohuć zaparolić kožnuju pakupku i nie zachoŭvać infarmacyju ŭ naładach braŭziera, jakaja moža dazvolić rabić pakupku paŭtorna».
