Vybarčyja kamisii pakinuli Viktaru Babaryku tolki 165 744 podpisaŭ z 365 tysiač padadzienych. Jak adbyvajecca heta filtracyja i čym pahražaje pretendentu?
Patłumačym na prykładzie Frunzienskaha rajona Minska. Tut było padadziena 47 426 podpisaŭ u padtrymku Babaryki.
Kamisija pavinna pravieryć nie mienš za 20% ź ich (9485 podpisaŭ). Kolki ŭsio ž taki brać na pravierku i jakija mienavita arkušy, vyrašaje sama kamisija.
Kali akazałasia, što bolš za 15% pravieranych podpisaŭ niesapraŭdnyja, to biarucca dla pravierki jašče 15% (7 114 podpisaŭ).
Takim čynam, u Frunzienskim rajonie pravieryli minimum 16 599 podpisaŭ (20%+15%). I nibyta vyjaviłasia, što nie mienš za 2490 podpisaŭ ź ich — niesapraŭdnyja.
U takoj situacyi na Babaryku nie zaličvajuć usie 47426 podpisaŭ Frunzienskaha rajona. Ź ich niesapraŭdnymi ličacca tolki tyja 2490, zhadanyja raniej, a astatnija prosta źnikajuć u nikudy.
Kali «niesapraŭdnych» podpisaŭ zamnoha, pretendenta ŭ prezidenty pavinny źniać z honki.
U artykule 68-1 Vybarčaha kodeksa paznačana, što heta adbyvajecca ŭ vypadku, kali ŭ ahulnym pa krainie ŭ kandydata znajšli 15% niesapraŭdnych podpisaŭ ad ahulnaj kolkaści pravieranych podpisaŭ.
Ci mohuć Viktaru Babaryku admović u rehistracyi na padstavie hetaha punkta? «Naša Niva» spytała ŭ kiraŭnicy CVK Lidzii Jarmošynaj.
«U Babaryki nie daciahvaje da 15%, jak skazali mnie našy supracoŭniki. U jaho dola niesapraŭdnych podpisaŭ — 13%», — patłumačyła Jarmošyna.
Kali b kamisii naličyli Babaryku jašče 2% niesapraŭdnych podpisaŭ, to jamu b zabaranili ŭdzielničać u vybarach.
