Paŭerliftar Siarhiej Šabanaŭ pracuje trenieram u Biełaruskim dziaržaŭnym univiersitecie fizičnaj kultury. Praŭda, pracuje tam apošni tydzień. Pa słovach chłopca, jamu nie stali praciahvać kantrakt paśla jaho admovy padpisacca za dziejnaha prezidenta.
Fota sa staronki «UKantakcie»
Siarhiej rodam z Barysava. Ź piaci hadoŭ zajmaŭsia spartyŭnymi tancami, tamu i vyrašyŭ pastupać u BDUFK. Ale na pieršym kursie da tancaŭ astyŭ.
«Va ŭniviersitecie vykładčyki nie vielmi pryjemna adhukajucca pra tancoraŭ nie samaha vysokaha kłasu. Mnie heta mocna nie padabałasia, — tłumačyć Siarhiej. — Nasuprać zały tancaŭ była trenažornaja, i ja vyrašyŭ pahladzieć: a što tam adbyvajecca? I z treciaha kursa pačaŭ zajmacca paŭerliftynham. Sioleta rychtavaŭsia da svaich pieršych spabornictvaŭ pa paŭerliftynhu — kali b nie karanavirus, jany ŭžo prajšli b».
Paru hod tamu pry ŭniviersitecie pabudavali płavalny kompleks, dzie adkryli trenažornuju zału. Siarhiej pa raźmierkavańni ŭładkavaŭsia tudy trenieram pa ahulnaj fizpadrychtoŭcy.
Chłopiec raskazvaje, što nikoli nie chavaŭ svaich svabodnych pohladaŭ. Na pieršym kursie admoviŭsia ŭstupać u BRSM — praŭda, paśla daviedaŭsia, što jaho tudy ŭsio adno zapisali. Na druhim nie staŭ hałasavać.
«Heta byŭ 2015-y, hod vybaraŭ. Naziraŭ takuju karcinku. Studenty-vydatniki nadziavali kaściumy, ich na pieršym paviersie stroili ŭ šerah i pa kamandzie pa 2-6 čałaviek adpraŭlali hałasavać na kamieru ŭ toj momant, kali tam byŭ prezident. Čakali jaho pryjezdu, smažylisia ŭ kaściumach hadziny pa try. Ja ŭ hetym nie ŭdzielničaŭ».
Siarhiej taksama vychodziŭ na akcyju suprać padatku na darmajedstva. Ale va ŭniviersitecie zmoh davučycca.
«Chutčej za ŭsio, mianie ratavaŭ status siraty, — miarkuje chłopiec. — Kožny raz, kali mianie vyklikali na razmovu na dyvan, ja nahadvaŭ pra heta».
Trenieram chłopiec adpracavaŭ dva hady. Pretenzij, kaža, da jaho raboty nie było. Naadvarot, niekatoryja kalehi navat źviartalisia da jaho pa parady.
Fota sa staronki «UKantakcie»
Zvalnieńniem jamu pryhrazili paśla admovy padpisacca za vyłučeńnie ŭ kandydaty Alaksandra Łukašenki.
«Ja zachodziŭ padpisvać zajavu na adpačynak. A tam jakraz byli ludzi, jakija zajmajucca zboram podpisaŭ. I kiraŭnica BRSM, jakaja mianie nie viedała, pytajecca: «A ty ŭ nas chto? Padpisvaŭsia?» Ja hučna pačynaju śmiajacca. Kažu: padpisvacca nie budu. Tut u kabiniet uryvajecca kiraŭnictva i pačynaje mnie tłumačyć, što ja niapravilna rablu i što ŭ našym univiersitecie ja ŭžo pracavać nie budu».
7 lipienia ŭ Siarhieja apošni pracoŭny dzień. Kantrakt praciahvać nie buduć. Aficyjnaj pryčynaj trenieru nazvali toje, što jaho pasadu vyrašyli prosta skasavać.
Novaje miesca pracy chłopiec jašče nie znajšoŭ.
«Było šmat płanaŭ, jany ŭsie nakrylisia miednym tazam. Byŭ płan pajechać u Kitaj trenieram — miežy začynili. Ja i sam viedaju krychu kitajskuju, i pierakładčyka mnie dali b. A inšyja arhanizacyi, kudy źbiraŭsia, — u pazykach».
Univiersitet: «Nie ŭ kursie, pra kaho vy kažacie»
«Naša Niva» źviarnułasia pa kamientar u rektarat BDUFK, ale tam tłumačyć situacyju admovilisia.
«Ja nie ŭ kursie, pra kaho vy kažacie i čamu nie praciahnuli kantrakt. U nas u kursie kadry i rektar — jon prymaje kančatkovaje rašeńnie. Rektar ciapier na balničnym. A ja kamientary pa telefonie nikomu nie daju.
Ja ciapier vykonvaju abaviazki rektara, u mianie vielmi šmat pracy, patelefanujcie na nastupnym tydni. Siońnia i zaŭtra ŭ mianie mahčymaści z vami sustrecca niama», — adkazaŭ pieršy prarektar Siarhiej Šaŭruk.
U adździele kadraŭ patłumačyli, što nie majuć prava kamunikavać z presaj.
Čytajcie taksama: Minpracy pra treniera z Univiersiteta fizkultury, jaki nie padpisaŭsia za Łukašenku: Jon sam padaŭ zajavu na zvalnieńnie
