Apošni tydzień pracy kramy Symbal.by byŭ asabliva haračym. Sotni čałaviek stajali ŭ čerhach, kab padtrymać biełaruskamoŭny biznes — niahledziačy na chapun i cicharoŭ z kamieraj. Zatrymańni asudzili viadomyja artysty i televiadoŭcy — niekatoryja ź ich užo stracili pracu na dziaržTB i kancertach.
Ad paniadziełka krama zakrytaja. Jaje stvaralnik Pavieł Biełavus zakančvaje pieraŭlik i raskazvaje «Našaj Nivie», čaho čakać dalej.
Fota Voli Aficeravaj
«Nas prosta zdźmuła salidarnaściu!»
Za minuły tydzień u kramie raspradali 95% tavaraŭ.
«Kali b u zvyčajnym farmacie pracavali, to hetu kolkaść my pradavali b minimum čatyry miesiacy. Amal ničoha nie zastałosia — tolki niekalki asobnikaŭ zimovych rečaŭ (švedry, šapki, šaliki). Vyšymajki skončylisia jašče ŭ piatnicu»,
— raspaviadaje Pavieł.
«U 2014-m była pieršaja vyšymajka, a ciapier u našaj kramie zastałasia adna apošniaja. My vyrašyli jaje nie pradavać, a paznačyć proźviščam Viktara Babyryki, kab padaryć, kali jon vyjdzie z turmy», — napisaŭ u Facebook Pavieł Biełavus
Raskupili navat rečy biez pryntoŭ — krama nie zmahła nanieści malunki, bo na partnioraŭ pačaŭsia cisk.
«Da pradprymalnika, jaki apošnim časam nam drukavaŭ prynty, pryjšli z pravierkaj pažarnyja i vystavili patrabavańnie spynić dziejnaść da vyrašeńnia prablemaŭ, jakija ŭ dačynieńni da jaho vyjavili. I takich historyj niekalki. Byli pravierki navat u vytvorcaŭ, jakija raniej z nami nie pracavali. Da kahości prychodzili z vusnymi patrabavańniami nie drukavać rečy z palityčnym kantekstam», — kaža Biełavus.
U Symbal.by za apošni miesiac naviedalisia i z padatkovaj, i z adździeła pa baraćbie z ekanamičnymi złačynstvami milicyi, i z sanstancyi. Dva tydni tamu kramie adklučyli elektryčnaść, choć nijakich zapazyčanaściaŭ pa apłacie nie było. Daviałosia vykručvacca.
«Pieršyja dni my padklučyli paru akamulataraŭ, kab siłkavać kasu, terminał i kampjutar. Paśla nam adna pryvatnaja firma pieradała piać lichtaroŭ, jakija my pastavili ŭ roznych pakojach. Nu i nam paščaściła, što ciapier červień, samyja doŭhija dni, što dazvoliła spakojna pracavać da vaśmi.
A kali adbyłasia historyja z aŭtazakam, da nas źviarnuŭsia adzin z susiedziaŭ: davajcie ja vam elektryčnaść ad siabie dam, praz padaŭžalnik zmožacie padklučycca».
Pavieł byŭ vielmi ŭražany tym, kolki ludziej pryjšło ich padtrymać.
«Nas prosta zdźmuła salidarnaściu! Dziaržaŭnaja prapahanda pisała, što čarha fiktyŭnaja. Ale ŭsie ludzi, jakija stajali pad kramaj, niešta nabyvali. Čaściakom im navat było niavažna, što brać. Kožny dzień faktyčna 600 čałaviek rabiła pakupki».
Televiadoŭca Dzianis Dudzinski ŭ čarzie ŭ kramu
Naviedvalniki prynosili padarunki — pierniki, torty. Kiraŭnik stamatałahičnaha centra zaprasiŭ supracoŭnikaŭ kramy biaspłatna lačyć u jaho zuby. Pisali jurysty, byłyja rabotniki padatkovaj, sanstancyi: maŭlaŭ, hatovy dapamahčy vam padrychtavać dakumienty, kab adbicca ad pravierak.
«Jość pieražyvańni, što heta moža zakranuć nie tolki biznes»
Kali pačaŭsia cisk na Symbal.by, niekatoryja kazali: nie varta było ŭviazvacca ŭ palityčnyja hulni i zapuskać prynt «Psicho3%». Biełavus tłumačyć, što jany nie mahli zrabić inakš. U kramie i raniej pradavali nie tolki vyšymajki — tut i «Pahonia», i prynty na temu darmajedskich akcyj.
«Ad samaha pačatku my adstojvali pryncypovuju pazicyju, što, z adnaho boku, pracujem absalutna lehalna, płacim usie padatki. A ź inšaha, ličym, što majem prava vykazvacca na złabadzionnyja temy. My za toje, kab Biełaruś była svabodnaj i niezaležnaj.
Kali pačałasia pieradvybarčaja historyja, było jasna, što treba adreahavać. Bo padčas prezidenckaj kampanii palityzacyja ludziej adbyvajecca nievierahodnaja, i jany chočuć svaju pazicyju vykazvać praź vizualnyja formy. Ideja z pryntom «Psicho3%» u kalektyvie spantanna źjaviłasia. I my vyrašyli pravieryć, ci budzie zapatrabavany taki dyzajn. Adkryli na sajcie pieradzamovu — i adbyŭsia nievierahodny vybuch aktyŭnaści. Za tydzień my atrymali bolš za tysiaču zamoŭ na hetu liniejku rečaŭ. I zrazumieli, što patrapili ŭ kropku.
Ale toje, što budzie takaja niervovaja reakcyja, my, kali ščyra, nie čakali. Dumali, tolki skažuć: aj-jaj-jaj, nie treba. Ale adrazu ŭbačyli žorstkuju kamandu «fas» u dačynieńni da ŭsioj našaj dziejnaści».
Pavieł pra toje rašeńnie nie škaduje. U ekanamičnym płanie krama ničoha nie zhubiła. Z astatnim možna spravicca.
«My krama z hramadskaj pazicyjaj. My pajšli na hetu ryzyku, kab pakazać, što adbyvajecca ŭ krainie. I ja nie ŭpeŭnieny, što, kali b my siadzieli cichieńka, toje samaje z nami nie zdaryłasia b. Pryjšli b praz dva tydni, praź miesiac. My maŭčać nie možam i nie budziem.
Kaniečnie, jość pieražyvańni, što heta moža zakranuć nie tolki biznes, a pačnuć čaplacca da siamji. Ale spadziajusia, chapiła sumleńnia ŭ ludziej, jakija zajmajucca hetym, vieści spravy tolki ŭ dačynieńni da kamiercyjnaj arhanizacyi. Pakul što niejkaha cisku na sabie asabista ja nie adčuvaŭ»,
— dzielicca pradprymalnik.
Što dalej?
Pa słovach Biełavusa, jany pastarajucca zachavać kalektyŭ. Chtości pojdzie ŭ adpačynak, chtości praciahnie pracavać, bo zadač chapaje.
«U nas mocny kalektyŭ, ja vieru, što dla ŭsich Symbal.by — častka žyćcia, a nie prosta praca dziela pracy. Spadziajusia, kali niejkich novych dziejańniaŭ suprać nas nie pačniecca, my ŭ najbližejšy čas adnovim internet-kramu i zabiaśpiečym minimalny asartymient. Bo ciapier asnoŭnaje pytańnie z usich kutkoŭ śvietu: dzie nabyć bieł-čyrvona-bieły ściah?»
Čytajcie pa temie:
Čarhovy chapun u Minsku. Milicyja zatrymała ludziej, jakija stajali ŭ čarzie da kramy Symbal.by. MUS tłumačyć čamu
Aktrysa Kupałaŭskaha z «kavunovaha bataljona» Łukašenki adreahavała na zatrymańni kala Symbal.by
Eks-viadučy BT Dzianis Kurjan pra situacyju z Symbal.by: Što heta było? Čakaju ad kiraŭnictva milicyi tłumačeńniaŭ
