Fota Nadziei Bužan
Hramadzianka Ukrainy akazałasia siarod paciarpiełych klijentaŭ Biełhazprambanka, u jakich paśla pieratrusu ŭ hałoŭnym ofisie banka źnikła źmieściva depazitnych jačejek. Pavodle jaje słoŭ, u jaje znachodziłasia ŭ banku bolš za 170 tysiač dalaraŭ. Z-za źniknieńnia hrošaj Maryna (imia źmieniena) napisała zajavu ŭ milicyju. Jana taksama pakinuła elektronny zvarot na sajcie Łukašenki, u jakim paprasiła jaho «pasadziejničać u viartańni hrašovych srodkaŭ, kanfiskavanych biez majho viedama i pa niezrazumiełych mnie pryčynach», piša Tut.by.
Maryna raspaviadaje, što pra źniknieńnie hrošaj ź jačejki daviedałasia 26 červienia, paśla taho jak pryjechała ŭ Biełaruś i naviedała hałoŭny ofis Biełhazprambanka. Da hetaha jana była ŭ banku prykładna ŭ kancy lutaha — pačatku sakavika. «Paśla hetaha byŭ karancin, da taho ž patreby nie było, — udakładniaje jana. — A ŭ minułuju piatnicu razam z žanichom schadzili ŭ hałoŭny ofis. Skrynia ŭ depazitnaj jačejcy, u jakim zachoŭvalisia hrošy, była pustaja. Adrazu ž napisali zajavu na imia Nadziei Jermakovaj i vyklikali milicyju na miesca zdareńnia».
U HUUS Minharvykankama paćvierdzili, što atrymali zajavu.
Pa słovach Maryny, u depazitnaj jačejcy znachodziłasia bolš za 170 tysiač dalaraŭ. Jana kaža, što moža paćvierdzić pachodžańnie hrošaj, ale pra heta jaje nichto nie prasiŭ pierad tym, jak zabrać ich ź jačejki.
— Heta ŭsie maje hrošy. Heta nie toje što złačynstva, heta kradziež na ŭzroŭni dziaržavy. Mnie składana zrazumieć, jak mahčyma dziaržaŭnym strukturam zajści ŭ pamiaškańnie ź jačejkami i ŭziać u mianie hrošy biez majoj prysutnaści ci chacia b papiaredniaha paviedamleńnia. Nie dumała, što takoje biaźmiežža mahčyma, — kaža hramadzianka Ukrainy. — Ja nijakim čynam nie źviazanaja ni z vybarami ŭ krainie, ni z palitykaj, ni z kiraŭnictvam banka.
Maryna raspaviadaje, što razhladała mahčymaść adkryć biznes u Biełarusi. Mahčyma, ukłaści hrošy ŭ nieruchomaść. Ale paśla taho, što adbyłosia, kaža, što žadańnie źnikła.
8 lipienia Marynie treba viarnucca dadomu, jana spadziajecca, što da hetaha času prajaśnicca situacyja ź jaje źnikłymi hrašyma. U banku joj siońnia adkazali, što pieradali zvarot u Departamient finansavych rasśledavańniaŭ dziaržkantrolu, bo «zvarot źmiaščaje pytańni, rašeńnie jakich nie adnosicca da kampietencyi Biełhazprambanka». Maryna płanuje źviartacca ŭ inšyja biełaruskija instancyi, u tym liku pry nieabchodnaści ŭ Hienprakuraturu, a kali nie atrymajecca vyrašyć pytańnie — to i ŭ mižnarodnyja arhanizacyi.
Maryna pakinuła elektronny zvarot na sajcie Łukašenki, u jakim paprasiła jaho «paspryjać u viartańni hrašovych srodkaŭ, kanfiskavanych biez majho viedama i pa niezrazumiełych mnie pryčynach».
Nahadajem, niekatoryja klijenty Biełhazprambanka napisali zajavy ŭ bank z-za ŭskryćcia depazitarnych jačejek bieź ich prysutnaści i straty źmieściva. Heta vyjaviłasia, kali jany na minułym tydni zmahli pravieryć ich źmieściva. Da hetaha trapić u pamiaškańnie ź jačejkami nielha było z-za śledčych dziejańniaŭ. Pry hetym klijenty adznačajuć, što ich nie apaviaščali pra jakija-niebudź dziejańni ŭ dačynieńni da ich kaštoŭnaściaŭ, a niekatoryja ź ich, jak miarkujecca, trapili ŭ kadr siužetu BT, u jakim havaryłasia pra «spravu Biełhazprambanka» i pakazvalisia kadry pieratrusu ŭ banku.
U kadr akramia hrašovych kupiur, niekatoryja ź jakich spakavanyja ŭ čornyja polietylenavyja miaški i papiarovyja skrynki, taksama patrapili pamiatnyja maniety Nacbanka Biełarusi (da prykładu, «Biełaruski balet. 2006»), nievialikija załatyja źlitki, jak miarkujecca, inviestycyjnyja maniety Banka Rasii, try ŭpakoŭki ad łedžaraŭ dźviuch madelaŭ — śpiecyjalnych kašalkoŭ dla kryptavaluty (ci byli ŭ ich sami łedžary — nieviadoma).
Maryna taksama kaža, što jaje hrošy, jakija byli skručanyja humkami, jak miarkujecca, trapili ŭ kadr u siužecie.
