U abłasnym sudzie 30 červienia hrodziencu Uładzimiru Navumiku vynieśli prysud pa dvuch artykułach Kodeksa ab administracyjnych pravaparušeńniach (KaAP). Mužčynu zatrymali 29 maja razam z błohieram Siarhiejem Cichanoŭskim, piša hrodna.life.
Razhladalisia administracyjnyja spravy ŭ budynku Hrodzienskaha abłasnoha suda. Abvinavačany ŭ zale nie prysutničaŭ, jon praciahvaje znachodzicca ŭ SIZA № 1 u Minsku. Na sudzie jon prysutničaŭ pa videasuviazi.
Sudzili Navumika pa artykułach 17.1 KaAP (drobnaje chulihanstva) i 23.4 KaAP (Niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni). Śviedkami na sudzie vystupali supracoŭniki AMAPu Pavieł Chalava i Alaksandr Mackievič.
29 červienia Navumik paprasiŭ sudździu padčas pieršaha pasiadžeńnia pradastavić videa sa svajho telefona, jaki byŭ kanfiskavany ŭ miežach kryminalnaj spravy, i videa padziejaŭ na płoščy 29 traŭnia ź internetu. Chadajnictva spačatku było adchilena, ale, pa prośbie žonki i baćki mužčyny, sudździa dała mahčymaść Navumike dakazać svaju nievinavataść.
U sudovym pracesie byŭ pierapynak da 30 červienia. Na nastupny dzień razhladu spravy sudździa nie paličyła pradastaŭlenyja abaronaj videa dokazam nievinavataści Navumika. Videa byli pradstaŭleny z roznych resursaŭ: TUT.BY, telehram-kanała Nexta i telekanała «Biełaruś-1».
Na adnym ź videa bačna, jak Navumik sychodzić za słužbovy aŭtamabil. Sa słoŭ abvinavačanaha, tam jaho i zatrymali. Ale na videa nie bačna, kab jon łajaŭsia matam ci akazvaŭ supraciŭ supracoŭnikam milicyi. Na padstavie niedakładnych pakazańniaŭ śviedak i adsutnaści pravaparušeńnia na videa abarona Navumika prasiła sud spynić spravu. Ale sud pryznaŭ hrodzienca vinavatym i prysudziŭ dadatkova 10 sutak administracyjnaha aryštu. U SIZA ŭ Minsku Uładzimir Navumik znachodzicca ŭžo miesiac. Jon prachodzić pa art. 342 (Arhanizacyja ci aktyŭny ŭdzieł u hrupavych dziejańniach, jakija hruba parušajuć hramadski paradak).
