Leanid Paškoŭski. Fota sa staronki błohiera va Ukantakcie.
Aŭtar papularnaha treveł-błoha «Chaču damoŭ» Lonia Paškoŭski vykazaŭsia ŭ instahramie pra padziei ŭ Biełarusi, źviazanyja z vybarami.
«Bolš za ŭsio ŭ pieradvybarnaj historyi 2020 mnie padabajecca toje, što ŭpieršyniu alternatyŭnyja kandydaty vykarystoŭvajuć mozh, zamiest taho, kab ekspłuatavać abstraktnyja revalucyjnyja łozunhi, mała kamu blizkija sa zvyčajnaha naroda. A nam vielmi patrebna ŭłada, jakaja ŭmieje karystacca nie palicejskimi dubinkami, a mozham.
Mianie vielmi natchniaje toje, jakimi sposabami nam prapanujuć zmahacca ź sistemaj — vyklučna zakonnymi. I heta asabliva efiektna ŭ situacyi, kali biezzakońnie stała prerahatyvaj ułady. Ja baču kłopat pra ludziej u tym, što ŭ hety raz nas nie zaklikajuć vychodzić na vulicy, nie robiać Płošču pieršym punktam svajoj pieradvybarnaj prahramy, tłumačać, što nie varta adbivać ludziej, jakich zatrymlivajuć, u haniebnych raboŭ u hramadzianskim, kab nie zarabić sabie «kryminałku».
Nam upieršyniu pakazali, što my možam nabrać krytyčnuju masu nie ŭ vyhladzie natoŭpu, jaki harłapanić, a ŭ vyhladzie aktyŭnaj supolnaści, u jakoj kožny moža zrabić svoj absalutna zakonny ŭkład va ŭzłom sistemy znutry. Nam narešcie tłumačać: dla taho, kab źmianić stan rečaŭ, zusim nie treba stanavicca revalucyjanieram ci, nie daj boh, zmaharom.
Tamu i treba padtrymlivać inicyjatyvu pa praviadzieńni refierendumu ab źmienie kanstytucyi. Tak, rašeńnie ab jaho praviadzieńni ŭsio roŭna budzie prymać dziejny prezident, i nadziei na chepi end mała. Ale heta, u pieršuju čarhu, jašče adzin pryhožy sposab pakazać uładzie, što my nie tupy narodziec, zhodny viečna charčavacca adpiskami. Što my, u adroźnieńnie ad prezidenta, usie hetyja hady raźvivalisia, raśli, razumnieli i hatovyja stać hramadzianami prahresiŭnaha i spraviadlivaha hramadstva, a nie maleńkaj, biednaj afrykanskaj dyktatury pasiarod Jeŭropy.
Tamu samaje karysnaje, što možna zaraz zrabić, heta ŭstupić u inicyjatyŭnuju hrupu dla praviadzieńnia refierendumu. Heta nie tak strašna i nie tak baluča, jak vychodzić na płošču. I, jak moža apynucca, značna bolš efiektyŭna. Biełarusy, vy krutyja!» — napisaŭ Lonia Paškoŭski ŭ instahramie.
Lonia Paškoŭski — biełaruski treveł-błohier, videa z ekzatyčnych miescaŭ śvietu na jaho kanale «Chaču damoŭ» źbirajuć miljony prahladaŭ. Na akaŭnt błohiera ŭ instahramie padpisana bolš za 40 tysiač čałaviek.
