Alaksandr Łukašenka ŭpeŭnieny, što ŭ biełaruska-rasijskich adnosinach udasca vyrašyć isnujučyja prablemy. Ab hetym jon zajaviŭ siońnia na sustrečy ź ministram zamiežnych spraŭ Rasii Siarhiejem Łaŭrovym, pieradaje BiełTA.
Uličvajučy, što litaralna pierad sustrečaj ź ministram Alaksandr Łukašenka parazmaŭlaŭ pa telefonie sa svaim rasijskim kaleham Uładzimiram Pucinym, Siarhiej Łaŭroŭ pačaŭ sa słoŭ: «Ja pryvitańnie nie pieradaju vam ad Uładzimira Uładzimiraviča».
«Heta ja vam chaču pieradać, — adkazaŭ Łukašenka. — Ja tolki što ź im razmaŭlaŭ. Tamu ja vam pieradaju pryvitańnie ad načalnika. U nas sapraŭdy adbyłasia takaja adkrytaja, dobraja razmova. Chacia mnohija tut dumajuć, što ŭ nas niešta iskryć. Ničoha ŭ nas nie iskryć! Jość prablemy zaŭsiody».
«Iskra patrebna dla zapalvańnia, kab pajechać napierad», — adznačyŭ Siarhiej Łaŭroŭ.
«Pravilna, — pahadziŭsia Alaksandr Łukašenka. — Tak my i razhladajem našy adnosiny. Chapaje, viadoma, prablem i ŭ nas, i ŭ vas. Heta i pandemija (jana abvastryła mnohija prablemy), i na mižnarodnym uzroŭni (vy heta lepš za mianie adčuvajecie i razumiejecie). I ŭ vas siońnia palityčnych prablem zašmat u suviazi z pryniaćciem novych papravak u Kanstytucyju. U nas — prezidenckija vybary. Tamu sapraŭdy, jak u bratoŭ, usio idzie paralelna, lustrana prajaŭlajucca hetyja prablemy, što ŭ vas, što ŭ nas».
«Dumaju, my ich vyrašym. Heta nie katastrafičnyja prablemy», — upeŭnieny Łukašenka.
«Tamu, kali niechta raźličvaje sutyknuć nas iłbami i pahoršyć našy adnosiny, heta nie atrymajecca. Ja ź im absalutna zhodny. Kali niechta na heta raźličvaje, hetaha sapraŭdy nie budzie», — praciahnuŭ kiraŭnik dziaržavy.
