Suśvietnaja Arhanizacyja Achovy zdaroŭja (SAAZ) nazvała «navukovym praryvam» vyniki brytanskaha kliničnaha daśledavańni RECOVERY. Zhodna ź im, vykarystańnie kortykasteroida deksamietazona dazvalaje źnizić śmiarotnaść ad COVID-19. Pra heta havorycca ŭ zajavie aficyjnaha pradstaŭnika SAAZ.
«Heta pieršaje lačeńnie, [vyniki] jakoha demanstrujuć źnižeńnie śmiarotnaści, — adznačyŭ hienieralny dyrektar arhanizacyi Tedras Hiebrejesus. — Ja vinšuju ŭrad Vialikabrytanii, Oksfardski univiersitet, a taksama šmatlikija brytanskija balnicy i pacyjentaŭ, jakija zrabili svoj uniosak u hety navukovy praryŭ».
Pa słovach kiraŭnika daśledavańnia, prafiesara Oksfardskaha univiersiteta Pitera Chorbi, deksamietazon staŭ «pieršymi lekami, jakija prademanstravali palapšeńnie pakazčykaŭ vyžyvalnaści pry COVID-19». Chorbi ličyć, što preparat pavinien być nieadkładna ŭklučany ŭ pratakoły lačeńnia karanavirusnaj infiekcyi.
U daśledavańni, jakoje pravodzicca z sakavika, biaruć udzieł 11,5 tys. pacyjentaŭ z 175 brytanskich balnic. 2,1 tys. udzielnikaŭ daśledavańnia atrymlivali deksamietazon, adnak vyvučałasia taksama efiektyŭnaść antyretravirusnaha preparata łapinavira/ rytanavira, antybijotyka azitramicyna, imunadepresanta tacylizumaba, pieralivańnia chvorym płazmy kryvi pacyjentaŭ, jakija pieranieśli COVID-19, a taksama procimalaryjnaha preparata hidraksichłarachina. 4,3 tys. pacyjentaŭ u kantrolnaj hrupie atrymlivali tolki standartnaje lačeńnie.
Navukoŭcam nie ŭdałosia vyjavić śviedčańniaŭ taho, što hidraksichłarachin źnižaje śmiarotnaść siarod chvorych COVID-19, dazvalaje paskoryć praces vyzdaraŭleńnia abo stanoŭča ŭpłyvaje na stan chvorych inšym čynam. Pry hetym vykarystańnie deksamietazona ŭ daziroŭcy 6 mh u dzień dazvoliła na tracinu źnizić śmiarotnaść siarod pacyjentaŭ na štučnaj vientylacyi lohkich (u paraŭnańni z kantrolnaj hrupaj), a taksama na adnu piatuju siarod pacyjentaŭ, jakija atrymlivali kisłarod. Siarod chvorych, jakim nie patrabavałasia reśpiratornaja padtrymka, jakoha-niebudź efiektu vyjaŭlena nie było.
