Jak piša RBK, Słužba biaśpieki i infarmacyi (ŚBI) Čechii zakryła spravu ab pahrozie atručvańnia pražskich municypalnych palitykaŭ, paviedamlajecca na sajcie viedamstva.
Pa dadzienych śpiecsłužby, sprava akazałasia «prostaj i sumnaj historyjaj pra varožaść i zajzdraść» pamiž dvuma supracoŭnikami ambasady Rasii ŭ Prazie. Adzin ź ich, jak śćviardžaje viedamstva, vyrašyŭ naškodzić svajmu kalehu i danieści na jaho ŭ ŚBI.
Dypłamat nakiravaŭ u viedamstva ananimny elektronny list, u jakim paviedamiŭ pra pahrozu palitykam. U paviedamleńni havaryłasia, što ŭ krainu prybyŭ čałaviek z atrutaj rycyn. Paśla hetaha, jak paviedamlaje ŚBI, adbyłasia ŭciečka infarmacyi ŭ miascovyja ŚMI, što ŭskładniła pracu śpiecsłužby i rasśledavańnie spravy.
Tym nie mienš, havorycca ŭ paviedamleńni ŚBI, viedamstva zmahło raskryć, «što adbyłosia ŭ pasolstvie Rasii, chto stajaŭ za ananimnym pasłańniem i jakuju metu pieraśledvaŭ».
Na padstavie atrymanych dadzienych ułady Čechii vyrašyli vysłać dvuch supracoŭnikaŭ rasiejskaj ambasady. Viedamstva adznačaje, što jašče da hetaha dypłamatam dali mahčymaść «spakojna i cicha» pakinuć krainu, ale jany joju nie skarystalisia. «Takim čynam, abiedźvie asoby byli pryznanyja piersonami non hrata i pakinuli Češskuju Respubliku 7 červienia», — adznačaje ŚBI.
U kancy krasavika češskaje vydańnie Respekt apublikavała rasśledavańnie, dzie havaryłasia, što ŭ Prahu prybyŭ čałaviek z dypłamatyčnym pašpartam z Rasiei, jaki płanavaŭ atrucić kiraŭnika administracyi šostaha rajona Prahi Ondržeja Kołarža i mera češskaj stalicy Zdenieka Hržyba. Pieršy źjaŭlajecca arhanizataram demantažu pomnika maršału Konievu ŭ Prazie. U MZS Rasiei nazvali hetuju publikacyju fejkam, a ŭ Kramli — «hazietnaj kačkaj».
5 červienia premjer-ministr Čechii Andrej Babiš paviedamiŭ, što infarmacyja pra pahrozu atručvańnia nie paćvierdziłasia, iłžyvyja źviestki češskim śpiecsłužbam adpraviŭ adzin z rasiejskich dypłamataŭ. Babiš adznačyŭ, što incydent nanios škodu rasiejska-češskim adnosinam i pryvioŭ da praźmiernaj nahruzki na siły biaśpieki krainy. Z-za kanfliktu pamiž supracoŭnikami rasijskaj ambasady Čechija vyrašyła vysłać abaich dypłamataŭ.
