Pastajanny dakładčyk Jeŭrapiejskaha parłamienta pa Biełarusi, deputat ad Litvy Piatras Aŭštravičus 8 červienia źviarnuŭsia da vice-staršyni Jeŭrapiejskaj kamisii, viarchoŭnaha pradstaŭnika Jeŭrasajuza pa zamiežnych spravach i palitycy biaśpieki Žazepa Barelu z prośbaj adreahavać na represii ŭ dačynieńni da demanstrantaŭ i pradstaŭnikoŭ hramadzianskaj supolnaści, jakija adbyvajucca ŭ Biełarusi. Tekst lista apublikavany na sajcie Aŭštravičusa, piša tut.by.
U liście Aŭštravičusa adznačajecca, što jon «niepryjemna šakavany» pavodzinami biełaruskich uładaŭ, jakija ŭzmacnili represii ŭ dačynieńni da mirnych pratestoŭcaŭ i hramadzianskich aktyvistaŭ napiaredadni vybaraŭ 9 žniŭnia.
«Usio bolš biełarusaŭ aburanyja manipulavańniem uładaj prezidentam Łukašenkam, i pierśpiektyva svabodnych i spraviadlivych vybaraŭ zdajecca zmročnaj: režym vidavočna nie maje namieru stvarać roŭnyja ŭmovy dla hulni abo brać pad uvahu daŭnija rekamiendacyi Vieniecyjanskaj kamisii i Biuro ABSIE pa demakratyčnych instytutach i pravach čałavieka», — piša jeŭradeputat. Jon taksama paviedamiŭ, što jaho aściarohi padzialaje Anais Maryn, śpiecdakładčyk AAN pa pytańni ab stanoviščy ŭ halinie pravoŭ čałavieka ŭ Biełarusi.
Aŭštravičus nahadaŭ, što apošnija čatyry hady ES imknuŭsia dobrasumlenna supracoŭničać ź Minskam, padpisaŭšy pahadnieńni ab spraščeńni vizavaha režymu i readmisii, jakija ŭstupiać u siłu sioleta, a taksama padvoiŭšy abjom padtrymki i zładziŭšy techničnyja dyjałohi pa kankretnych pytańniach.
«Adnak biełaruski režym nie strymaŭ svaich abiacańniaŭ», — ličyć pastajanny dakładčyk Jeŭrapiejskaha parłamienta pa Biełarusi.
Jeŭradeputat prapanavaŭ Žazepu Barelu pieranakiravać srodki, jakija jość, arhanizacyjam hramadzianskaj supolnaści, jakija addanyja jaho kaštoŭnaściam. Pry hetym jon adznačyŭ, što zrabić heta budzie niaprosta, u suviazi z abmiežavańniami biełaruskich uładaŭ u dačynieńni da mižnarodnaj dapamohi subjektam hramadzianskaj supolnaści.
«Tym nie mienš ja liču, što ES pavinien pa mienšaj miery bolš aktyŭna vykazvacca ab imklivym zdušeńni svabod, vyrazna vykazvajučy salidarnaść z achviarami represij i biezumoŭna asudžajučy aryšty aktyvistaŭ, členaŭ apazicyi i kandydataŭ u prezidenty», — dadaŭ Aŭštravičus.
Jon taksama zajaviŭ, što «hłyboka zaniepakojeny aburalnymi sprobami dziaržaŭnych čynoŭnikaŭ i praŭładnych ŚMI pradstavić finansavuju i techničnuju dapamohu JEZ dokazam taho, što JEZ akazvaje padtrymku Łukašenku ci daje jamu niejki kart-błanš».
«Takija złamysnyja sproby dezynfarmacyi mohuć paŭpłyvać na imidž i papularnaść ES unutry krainy i za jaje miežami. Tamu ja zaklikaju vašy słužby apieratyŭna i staranna vyrašać takija situacyi. My pavinny dakładna danieści, što finansavaja i techničnaja dapamoha JEZ skiravanaja na toje, kab davać adčuvalnyja vyniki dla hramadzian, ale nijakim čynam nie na ŭzakońvańnie abo ŭmacavańnie aŭtarytarnaha režymu», — padkreśliŭ pastajanny dakładčyk Jeŭrapiejskaha parłamienta pa Biełarusi.
Aŭštravičus pierakanany, što ES pavinien pačać pierahlad palityki ŭ dačynieńni da Biełarusi, u tym liku «praduhledzieć sankcyi ŭ dačynieńni da słužbovych asob i inšych vinavatych u parušeńniach pravoŭ čałavieka i asnoŭnych svabod, kali eskałacyja hvałtu nie asłabnie, a prezidenckija vybary buduć praviedzienyja ŭ katastrafičnych abstavinach».
«Bieručy pad uvahu važnaść i ŭličvajučy situacyju, jakaja chutka paharšajecca ŭ Biełarusi, ja zaklikajuć vas dziejničać nieadkładna i adpravić jasny adnaznačny sihnał biełaruskim uładam», — źviarnuŭsia Aštravičus da Barelu.
