Fota z tvitara Iłana Maska
Kampanija SpaceX Iłana Maska ŭ supracoŭnictvie z NASA adpraviła na MKS dvuch amierykanskich astranaŭtaŭ na karabli Crew Dragon. Upieršyniu na MKS ludzi adpravilisia na transparcie pryvatnaj kampanii. Zapusk płanavaŭsia na 27 maja, adnak byŭ pieraniesieny na siońnia, 30 maja, praź niepahadź.
Ekipaž składajecca z dvuch astranaŭtaŭ Aerakaśmičnaha ŭpraŭleńnia ZŠA — 49-hadovy piłot Robiert Ljuis Bienkien i 53-hadovy kamandzir Duhłas Džerald Chiorli.
Palot pavinien doŭžycca 19 hadzin, i zaŭtra pa abiedzie SpaceX prystykujecca da MKS.
Heta pieršy palot amierykancaŭ u kosmas na ŭłasnym karabli z 2011 hoda. Tady ŭ ZŠA zakryli prahramu Space Shuttle. Z tych časoŭ Złučanyja Štaty vymušanyja byli braniravać miescy na palot da MKS i nazad tolki na rasijskich «Sajuzach».
NASA vyrašyła nie raspracoŭvać novy karabiel dla palotaŭ na MKS, a arhanizavała konkurs siarod pryvatnych kampanij ZŠA. U vyniku ŭ konkursie pieramahli kampanii Boeing i SpaceX.
Boeing raspracavała Starliner, a kampanija Iłana Maska — Crew Dragon.
Pry hetym bieśpiłotny test-piłot Starliner byŭ niaŭdałym, a bieśpiłotny test-palot Crew Dragon viasnoj minułaha hoda prajšoŭ paśpiachova.
