Alaksandr Łukašenka 25 maja padpisaŭ dekret numar 3 «Ab zamiežnaj biazvypłatnaj dapamozie».
Fota Nadziei Bužan
U dakumiencie zamacavany asnoŭnyja patrabavańni da paradku rehistracyi, padatkaabkładańnia i vykarystańnia adpaviednaj dapamohi.
Maksimalna kankretna vyznačany mety, na jakija jana moža być vykarystana: akazańnie miedycynskaj dapamohi i sacyjalnaj dapamohi, raźvićcio biblijatečnaj i muziejnaj spravy, zabieśpiačeńnie spartyŭnym abstalavańniem i inšyja sacyjalna značnyja mety. Dapamoha, jakaja pastupaje na hetyja mety, budzie vyzvalacca ad padatkaabkładańnia pa rašeńni kiraŭnictva spravami prezidenta Biełarusi. Mahčymaść vykarystańnia dapamohi na inšyja mety budzie vyznačacca śpiecyjalna stvoranaj mižviedamasnaj kamisijaj z adnačasovym pryniaćciem rašeńnia ab pradastaŭleńni padatkovych ilhot.
Pry hetym ad padatkaabkładańnia budzie vyzvalacca nie tolki dapamoha, ale i tavary (raboty, pasłuhi), što nabyvajucca (vykonvajucca, akazvajucca) na terytoryi krainy za košt srodkaŭ takoj dapamohi.
Za vyzvaleńniem ad padatkaŭ, zboraŭ (pošlin) zmohuć źviarnucca lubyja fizičnyja asoby — atrymalniki dapamohi. U vypadku kali dapamoha nie vyzvalajecca ad padatkaŭ, zboraŭ (pošlin), ź jaje atrymalnikaŭ — jurydyčnych asob i indyvidualnych pradprymalnikaŭ — budzie bracca płata za rehistracyju ŭ Departamiencie pa humanitarnaj dziejnaści kiraŭnictva spravami prezidenta Biełarusi ŭ pamiery 0,5 pracenta ad sumy (koštu) takoj dapamohi.
Usie pracedurnyja pytańni pastupleńnia dapamohi, jaje rehistracyi i ŭliku buduć urehulavany ŭradam sumiesna z kiraŭnictvam spravami prezidenta Biełarusi, Nacyjanalnym bankam i inšymi zacikaŭlenymi na padzakonnym uzroŭni. Pry hetym u adpaviednaści z patrabavańniami kiraŭnika dziaržavy ŭsie biurakratyčnyja pracedury pa rehistracyi dapamohi buduć źviedzieny da minimumu.
Novy dekret pryznaje straciŭšym siłu dekret ad 31 žniŭnia 2015 hoda numar 5 «Ab zamiežnaj biazvypłatnaj dapamozie» i ŭstupaje ŭ siłu praz try miesiacy paśla jaho aficyjnaha apublikavańnia.
