Fota: Maskoŭski zaapark
U Maskoŭskim zaaparku pamior misisipski alihatar Saturn. Zaasad paviedamlaje, što žyvioła pamierła ad staraści: jamu było kala 84 hadoŭ, što ličycca vielmi hłybokim uzrostam. U dzikaj pryrodzie praciahłaść žyćcia pradstaŭnikoŭ hetaha vidu 30-50 hadoŭ, piša Bi-bi-si.
Saturn naradziŭsia ŭ ZŠA prykładna ŭ 1936 hodzie, amal adrazu ž byŭ dastaŭleny ŭ Bierlinski zaapark, adkul źbieh paśla bambardziroŭki 23 listapada 1943 hoda.
Dzie jon pravioŭ nastupnyja try hady, nieviadoma. Ale pieražyŭ šturm Bierlina. Brytanskija sałdaty znajšli jaho tolki ŭ 1946 hodzie i pieradali SSSR. Užo ŭ lipieni taho hoda alihatar prybyŭ u Maskvu.
Tady ž naradziŭsia mif, što alihatar naležaŭ Hitleru.
U paviedamleńni Maskoŭskaha zaaparka ab Saturnie bačna čałaviečaja žurba.
«Saturn dla nas — heta cełaja epocha. U hetym niama ni najmienšaha pierabolšańnia. Jon pryjšoŭ paśla Pieramohi — i sustreŭ z nami jaje 75-hodździe. Heta vialikaje ščaście, što kožny z nas moh zirnuć jamu ŭ vočy, prosta cicha pabyć pobač. Jon bačyŭ mnohich z nas dziećmi. Spadziajemsia, što my jaho nie rasčaravali», - havorycca ŭ paviedamleńni Maskoŭskaha zaaparka.
Reptyliju časam nazyvali «alihataram Hitlera», pakolki jana žyła ŭ Bierlinie ŭ hady Treciaha rejcha. Ale raspoviedy pra toje, što Saturn nibyta byŭ častkaj asabistaha źviarynca Hitlera, administracyja zaaparka nazvała mifam.
«Navat kali čysta tearetyčna jon i naležaŭ kamuści — žyvioły nie datyčnyja da vajny i palityki, absurdna vinavacić ich u ludskich hrachach», - havorycca ŭ zajavie. Raspaviadajuć, što, niahledziačy na pažyły ŭzrost, Saturn moh raskusić stalovyja kanstrukcyi. Jon paznavaŭ supracoŭnikaŭ, jakija pastajanna karmili jaho, byŭ davoli razborlivy ŭ ježy i lubiŭ masaž ščotkaj.
Pamiać Saturna budzie ŭviekaviečana ŭ Darvinaŭskim muziei, paviedamiŭ zaapark.
