Usie šaściora zahinułych 17 maja ŭ DTZ na trasie M1 pad Barysavam byli niećviarozymi. Pra heta ŭ efiry «Radyjo-Minsk» raspaviała aficyjny pradstaŭnik Śledčaha kamiteta Julija Hančarova.
«Padčas śledstva było ŭstanoŭlena, što va ŭsich zahinułych prysutničaŭ ałkahol. Dakładnaja kancentracyja śpirtu ŭ ich kryvi budzie viadomaja pa vynikach ekśpiertnych daśledavańniaŭ, — prainfarmavała Julija Hančarova. — Pa fakcie DTZ raspačata kryminalnaja sprava ab parušeńni praviłaŭ darožnaha ruchu, što paciahnuła pa nieaściarožnaści śmierć šaści asob (č. 3 art. 317 KK). Ale pakolki ździajśnieńnie DTZ u stanie ałkaholnaha apjanieńnia — inšy artykuł, kryminalnaja sprava budzie pierakvalifikavanaja. Pakul što kazać pra heta rana, śledčym jašče treba budzie vyśvietlić usie abstaviny zdareńnia».
Vyśvietliłasia, što ŭ niadzielu troje maładych ludziej (27 hadoŭ i dvoje 21-hadovych) z tryma niepaŭnaletnimi dziaŭčynami adznačali dzień naradžeńnia na pryrodzie i raśpivali śpirtnyja napoi. Paśla hetaha kampanija adpraviłasia da kramy, dzie paznajomiłasia z dvuma maładymi ludźmi. Adzin ź ich i byŭ uładalnikam i kiroŭcam Renault. Novyja znajomyja padachvocilisia padvieźci imianińnika i jaho siabroŭ da adnaho z maładych ludziej dadomu.
«Chłopiec, jaki klikaŭ da siabie, pa niejkaj pryčynie ad hetaj idei admoviŭsia i pakinuŭ aŭtamabil. Kampanija vyrašyła praciahnuć mierapryjemstva i pajechać dadomu da adnaho z novych znajomych u Krupski rajon, — raspaviała Julija Hančarova. — Usie siamiora sieli ŭ mašynu i pajechali pa šašy. U niejki momant 21-hadovaha maładoha čałavieka paprasili vyjści z aŭto. Što adbyłosia i z-za čaho jon vyjšaŭ, jašče treba budzie vyśvietlić śledčym. Chłopiec zastaŭsia na darozie, a litaralna praź niekalki chvilin adbyłosia DTZ».
Aŭtamabil naležaŭ zahinułamu ŭ hetym DTZ 30-hadovamu žycharu Barysava. Małady čałaviek u 2018 hodzie byŭ pazbaŭleny pravoŭ kiroŭcy za kiravańnie ŭ niećviarozym stanie.
