Łukašenka nastojliva vystupaŭ suprać spynieńnia navučańnia, adnak u škoły pajšło tolki 30—40 % vučniaŭ — heta pa padlikach Minadukacyi, a ŭ realnaści, musić navat jašče mienš. Pra sens hetaha parazvažaŭ Andrej Dyńko ŭ padkaście PodKAS.
«Pandemija pakazała, što biełaruskaje hramadstva zastajecca hłyboka raździelenym. Amal Chantynhtanava miaža pa-raniejšamu prachodzić unutry hramadstva.
Nasupierak tamu, što časam možna pračytać, stratehija biełaruskich uładaŭ mieła mała padobnaha da šviedskaj.
Reakcyja Łukašenki na pandemiju nasamreč išła ŭ rečyščy bazavych zvyčajaŭ rasijskaj, a paśla savieckaj impieryi.
Nie pryznavać katastrof. A kali i pryznavać, to tolki pastfaktum. I tolki ŭ źmienšanym pamiery. Nie adkryvać statystyki, kab nikomu nie dać siabie vykryć. I nie dazvalać adkryta vykazvać sumnieŭ. Lubym koštam zachoŭvać zvyčajny paradak, nie dazvalać nijakim čynam adychodzić ad «viakami» ŭstanoŭlenaha paradku.
Ordnunh uber ales, navat kali koštam žyćcia ludziej.
Kultura padmanu ŭ takim hramadstvie pranizvaje ŭsie hramadskija tradycyi i supravadžaje čałavieka ad naradžeńnia da śmierci. Škoła hruntujecca na šporach i śpisvańni. Paciomkinskija vioski stvarajucca ŭ ekanomicy. Fasady budynkaŭ mohuć radykalna adroźnivacca ad zadnich ścienaŭ.
Absesiŭnaja zakrytaść uzychodzić da časoŭ rasijskaha absalutyzmu i dasiahnuła absalutu pry Stalinie i ŭ savieckaj sistemie. Nakont tradycyj zakrytaści — «Naša Niva» ŭ svoj čas vydała pierakład vielmi cikavaj knihi historyka Andžeja Sulimy Kaminskaha «Respublika suprać Aŭtakratyi: Reč Paspalitaja i Rasija ŭ 1686―1697 hadach».
Hałoŭnaja zadača sistemy — stvaryć uražańnie, što situacyja ŭ krainie lepšaja, čym u inšych krainach.
Abaviazkovy parad — kvintesencyja hetaha kultu paradku, dyscypliny, subardynacyi. Darečy, pra značeńnie paradaŭ dla rasijskaha hramadstva časoŭ Alaksandra I bliskuča pisaŭ fiłosaf Juryj Łotman u svaich «Narysach pa historyi ruskaj kultury».
Apanienty Łukašenki ŭ pytańni staŭleńnia da pandemii apielujuć zusim da inšych kaštoŭnaściej — adkrytaści, publičnaści, praŭdy, krytyčnaści.
Dźvie sistemy kaštoŭnaściej suisnujuć u miežach adnaho hramadstva i časam navat u miežach adnaho indyvida.
Jakaja ž dynamika hetych kaštoŭnaściej?
Svojeasablivym plebiscytam stała rašeńnie ludziej — adpraŭlać ci nie adpraŭlać svaich dziaciej u škoły. Pa aficyjnych źviestkach Ministerstva adukacyi, paśla adnaŭleńnia zaniatkaŭ tolki 30—40 % dziaciej pajšli ŭ škoły. I navat na siaredzinu maja hetaja ličba dasiahnuła tolki 41% — navat pa aficyjnych źviestkach. Hetyja ličby pakazvajuć stupień davieru da ŭładaŭ i stupień hatoŭnaści padparadkoŭvacca.
Hety cichi — choć pry hetym ahulnanacyjanalny — plebiscyt pakazaŭ, što dynamika ŭžo nie na karyść adeptaŭ rasijskich impierskich tradycyj», — skazaŭ Andrej Dyńko ŭ padkaście PodKAS.
