Fota Nadziei Bužan
Pra heta pretendent na pasadu prezidenta, były staršynia praŭleńnia Biełhazprambanka Viktar Babaryka paviedamiŭ u svaim fejsbuku.
«Voś my i skončyli prymać zajaŭki na ŭklučeńnie ŭ inicyjatyŭnuju hrupu. Tych, chto pakinuŭ zajaŭku paśla paŭnočy, my taksama pastarajemsia ŭličyć i ŭklučyć u śpisy. Nas 10101!!!», — napisaŭ bankir i dadaŭ:
«Heta nie prosta pośpiech, heta niachaj maleńkaja, ale vielmi važnaja pieramoha. I ŭ pieršuju čarhu heta pieramoha nad saboj. Ja vydatna razumieju, jak składana było vam zrabić hety krok: pieraadoleć unutranyja strachi i pieražyvańni, niavierje i sumnievy, lanotu i abumoŭlenuju zakanadaŭstvam niavyznačanaść majoj pazicyi pa mnohich važnych pytańniach. Ale vy zrabili heta, a značyć vy — pieramožcy! Vielizarny ŭsim dziakuj!»
Siońnia Babaryka idzie ŭ CVK padavać udakładnienyja i dapoŭnienyja śpisy. Inicyjatyŭnuju hrupu (IH) uznačalvaje jaho syn Eduard.
Viktar Babaryka padaŭ zajaŭku na rehistracyju inicyjatyŭnaj hrupy pa vyłučeńni kandydatam u prezidenty ŭ piatnicu, tady inicyjatyŭnaja hrupa naličvała 5 500 čałaviek. Dla paraŭnańnia, u inicyjatyŭnuju hrupu Łukašenki zapisali 11 tysiač čałaviek, Valeryj Capkała padaŭ 555 čałaviek, Andrej Dźmitryjeŭ — 1500 čałaviek. Byłyja ŭdzielniki prajmieryz «dla adčapnoha» padali hrupu ŭ 110 čałaviek.
Ale da paniadziełka možna było dapoŭnić śpisy.
CVK budzie razhladać pytańnie ab rehistracyi IH u aŭtorak i sieradu.
Usiaho z paniadziełka 11 maja padalisia na rehistracyju 55 čałaviek, amal pałova — pradstaŭniki «hrupy Statkieviča». Pryčym vosiem čałaviek CVK adrazu zabrakavała, matyvavaŭšy heta nastupnymi arhumientami: mnoha ludziej u śpisach supadaje, častka ŭdzielnikaŭ paśla telefanavańniaŭ admaŭlalisia ad udziełu ŭ IH.
Taksama adchilenyja zajaŭki IH «surovaha turysta» Vitala Ziałkoŭskaha z Maładziečna, błohiera Siarhieja Cichanoŭskaha («Kraina dla žyćcia»). U vyniku zamiest Cichanoŭskaha zajaŭku na ŭdzieł u vybarach padała jaho žonka Śviatłana.
Zarehistravanyja IH Alaksandra Łukašenki, lidara ŁDPB Aleha Hajdukieviča, aktyvista AHP z Homiela Uładzimira Niapomniaščych, a taksama fiermiera z Homielskaha rajona Juryja Hanceviča.
Zbor podpisaŭ pavinien startavać 21 maja i budzie doŭžycca da 19 červienia. Vybary prezidenta zapłanavanyja na 9 žniŭnia.
