Premjer Maraviecki ŭ adroźnieńnie ad jaho biełaruskaha kalehi pastajanna daje pres-kanfierencyi i pravodzić bryfinhi, dzie tłumačyć palityku ŭrada i zroblenyja zachady nakont karanavirusa, skrynšot videa tvn24.pl
Premjer Mateuš Maraviecki i ministr achovy zdaroŭja Łukaš Šumoŭski na pres-kanfierencyi paviedamili, što z 18 maja mohuć być adkryty cyrulni i kaśmietyčnyja sałony pry ŭmovie zachavańnia nieabchodnych sanitarnych normaŭ, paviedamlaje Radyjo Polšča.
Klijenty pavinny zapisvacca praź interniet ci telefon, a ŭ cyrulniach i sałonach pavinny paźbiahać čerhaŭ i trymać sacyjalnuju dystancyju.
U hety ž čas «zialonaje śviatło» budzie dadziena hastranamičnym ustanovam, taksama z vykanańniem mier zaściarohi, — skazaŭ premjer:
«Častkova adkryvajem taksama hastranamičnyja pasłuhi — restarany, bary, punkty hramadskaha charčavańnia, kafe, ale z zachavańniem sanitarnaha režymu ŭ pamiaškańniach, a taksama zvonku. My navat prosim uładalnikaŭ vystaŭlać stoliki na vulicu, bo, jak kažuć epidemijołahi, na śviežym pavietry značna biaśpiečniej», — skazaŭ Maraviecki.
Z 18 maja mohuć adnavicca praktyčnyja zaniatki ŭ technikumach i prafškołach. Taksama budzie źnižany limit u dačynieńni da kolkaści pasažyraŭ u hramadskim transparcie.
Z 25 maja ŭ škołu zmohuć viarnucca vučni małodšych kłasaŭ (z 1-ha pa 3-i).
Vučni 8-ch kłasaŭ i vypuskniki atrymajuć mahčymaść asabistych kansultacyj z nastaŭnikami, kab padrychtavacca da ispytaŭ. A z 1 červienia kansultacyi buduć dastupnyja dla ŭsich školnikaŭ.
Polšča ŭviała ŭ siaredzinie sakavika vielmi strohi karancin, zakryŭšy ŭsio što možna i ŭvioŭšy masačny režym.
Pa stanie na 13 maja ŭ krainie 17 062 vypadki karanavirusa (pamierli 847 čałaviek). Kolkaść vypadkaŭ zachvorvańnia na 1 młn składaje 451 čałaviek, tady jak u Biełarusi 2733 na 1 młn.
