U niadzielu 10 maja na płoščy Lenina ŭ Breście prajšło tradycyjnaje karmleńnie hałuboŭ u znak pratestu suprać akumulatarnaha zavoda, jaki pabudavany za niekalki kiłamietraŭ ad horada. Padobnyja akcyi prachodziać u horadzie z 4 sakavika 2018 hoda, paviedamlaje «Bresckaja hazieta».
Na praciahu apošnich dzion pierad akcyjaj pratestu byli zatrymanyja šeść čałaviek: aktyvisty Uładzimir Maroz, Juryj Kalko, Dzianis Małyšenka, Kanstancin Astapuk, Aleh Viałaŭ i błohier Siarhiej Piatruchin. Usie jany znachodziacca ŭ izalatary. Darečy, Siarhiej Piatruchin pravodzić tam svoj dzień naradžeńnia.
Uviečary 9 maja chutkaja zabrała ŭ špital błohiera Alaksandra Kabanava, jaki skardziŭsia na paharšeńnie samaadčuvańnia. Ciapier jon u balnicy ŭ adzinočnaj pałacie, da jaho prystaŭlenyja supracoŭniki milicyi.
Mahčyma, masavyja zatrymańni paŭpłyvali na toje, što na hety raz akcyja prajšła biez łozunhaŭ. Ludzi abmierkavali situacyju, jakaja skłałasia, na kamieru pavinšavali Siarhieja Piatruchina z dniom naradžeńnia, pažadali Alaksandru Kabanavu vyzdaraŭleńnia i moŭčki prajšli pa centralnych vulicach Bresta da kinateatra «Biełaruś».
Tym nie mienš, biez zatrymańniaŭ nie abyšłosia. Adrazu paśla akcyi AMAP zatrymaŭ pravaabaroncu Ramana Kiślaka i mužčynu, jakoha prysutnyja pryniali za pravakatara: jon pryjšoŭ na płošču z partretam Łukašenki. Pa niepaćvierdžanaj pakul što infarmacyi, zatrymanyja taksama siabra prafsajuza REP i jašče adzin udzielnik akcyi pratestu.
