Zdareńnie adbyłosia 3 maja, paviedamlaje aficyjny pradstaŭnik MUS Volha Čamadanava. Na śpiecliniju Departamienta achovy pastupiŭ sihnał, što spracavali knopki tryvožnaj sihnalizacyi ŭ adnoj ź juvielirnych kram u centry stalicy.
Naradu pradaŭcy raspaviali, što da ich pryjšoŭ małady čałaviek i paprasiŭ padabrać jamu ŭpryhažeńnie. Kansultant dastała sa stełaža try łancužki na vybar. Raptam naviedvalnik vychapiŭ dva ź ich (ahulnym koštam amal 6,5 tysiačy rubloŭ) i źbieh.
Apieratyŭniki kryminalnaha vyšuku ŭstanavili, što złamyśnik pierasoŭvaŭsia na aŭtamabili z numarami viciebskaha rehijona. Mašyna akazałasia arendnaj, a za rulom byŭ saŭdzielnik.
Asoby abodvuch mužčyn byli ŭstanoŭleny: raniej nieadnarazova sudzimyja za majomasnyja złačynstvy niepracujučyja žychary Viciebska 26 i 27 hadoŭ.
Na nastupny dzień uviečary na ŭjeździe ŭ Minsk z trasy M1 ich zatrymali pry siłavoj padtrymcy bajcoŭ staličnaha AMAPa. Maładyja ludzi viartalisia z Bresta, dzie sprabavali pa anałahičnaj schiemie abrabavać juvielirnuju kramu, ale nie zmahli: pradaviec-kansultant nie stała vykładvać upryhažeńni na pryłavak, a demanstravała ich praz škło.
