Na platfomie Petitions.by źbirajuć podpisy z patrabavańniem zabiaśpiečyć roŭny dostup da finasavych pasłuh dla biełaruskamoŭnych hramadzianaŭ. Dakument budzie nakiravany na razhlad u Saviet Ministraŭ i Pałatu pradstaŭnikoŭ Nacyjanalnaha schodu, pieradaje «Radyjo Svaboda».
Aŭtary petycyi narakajuć, što siońnia adsutničaje mahčymaść dostupu biełaruskamoŭnych hramadzianaŭ da pasłuh Adzinaj raźlikovaj i infarmacyjnaj prastory (ARIP) na dziaržaŭnaj biełaruskaj movie.
U adpaviednaści z artykułam 17 Kanstytucyi Respubliki Biełaruś, dziaržaŭnymi movami źjaŭlajucca biełaruskaja i rasiejskaja. Adnak stvoranaja ŭ krainie systema ARIP nie praduhledžvaje adnačasovaj najaŭnaści dźviuch movaŭ u damoŭnych adnosinach.
Meta kampanii:
- Na zakanadaŭčym uzroŭni ŭrehulavać mechanizm realizacyi kanstytucyjnaha prava na svabodny vybar dziaržaŭnaj movy znosinaŭ pry atrymańni finansavych pasłuhaŭ.
- Zamacavać patrabavańnie pra adnačasovaje abaviazkovaje padavańnie infarmacyi spažyŭcu na dźviuch dziaržaŭnych movach.
- Nadzialić AAT «NKFA «ARIP» pravam abaviazać vytvorcaŭ pasłuh ažyćciaŭlać adnačasovuju pieradaču infarmacyi na dźviuch movach dla mahčymaści dalejšaj jaje pieradačy na dziaržaŭnaj movie, vybranaj spažyŭcami finansavych pasłuh.
Ciapier dla pryjomu płaty ŭ roznych kanałach akazańnia pasłuh (raźlikova-kasavyja centry, infakijoski, u tym liku z funkcyjaj cash-in, internet- i mabilny bankinh i h. d.) banki vykarystoŭvajuć infarmacyju z aŭtamatyzavanaj systemy AIS «Raźlik». Jana vykonvaje rolu infarmacyjnaha pasiarednika ŭ pieradačy bankam patrabavańniaŭ na apłatu pasłuh ad vytvorcaŭ.
Dałučanyja da systemy bolš čym 18,5 tysiačy vytvorcaŭ pieradajuć u AIS «Raźlik» patrabavańni vyklučna na rasiejskaj movie. Akramia taho, scenary apłaty i vokny dyjalohaŭ, padkazki i dadatkovyja źviestki dla płatnikaŭ padajucca taksama tolki pa-rasiejsku.
Pavodle adkazu AAT «Niabankaŭskaja kredytna-finansavaja arhanizacyja «ARIP», realizacyja infarmacyjnaha ŭzajemadziejańnia adnačasova na dźviuch movach mahčymaja pry ŭmovie abaviazkovaha padavańnia ŭsimi vytvorcami pasłuhaŭ u AIS «Raźlik» infarmacyi na hetych movach. Ale «NKFA «ARIP» nia maje pravavych padstavaŭ abaviazać vytvorcaŭ heta rabić.
Heta možna acharaktaryzavać jak uzakonienuju praktyku dyskryminacyi hramadzianaŭ pavodle moŭnaj prykmiety, adznačajuć aŭtary petycyi.
