U historyjach tych, chto zachvareŭ na karanavirus i mieŭ zapaleńnie lohkich, časta sustrakajecca taki momant: pnieŭmaniju vyjaviła kampjutarnaja tamahrafija. Ad miedykaŭ taksama možna pačuć, što zapaleńnie lohkich na rańniaj stadyi bolš dakładna dyjahnastuje KT, a nie fluarahrafija.
U paliklinikach nakiravańnie na biaspłatnaje KT dajuć tym, u kaho vyjaŭleny karanavirus ci chto maje siptomy chvaroby i źjaŭlajecca kantaktam pieršaha ŭzroŭniu.
Ale nie ŭsim, chto maje pavyšanuju tempieraturu ci navat taki tryvožny simptom, jak strata niuchu, robiać test na karanavirus. Ci možna samomu płatna zapisacca na KT, kab nie zaniadbać pnieŭmaniju?
Fota Nadziei Bužan.
«Naša Niva» abzvaniła 17 minskich miedustanoŭ, dzie jość takaja pasłuha. U bolšaści ź ich płatnych abśledavańniaŭ ciapier nie robiać — u suviazi z karancinam u balnicach. Kali adnoviać, nieviadoma. U adnoj z ustanoŭ vykazali mierkavańnie, što minimum da kanca maja kabiniet płatnych pasłuh budzie zakryty.
U 38-j haradskoj paliklinicy nielha zapisacca, bo złamany aparat. «Niachutka adramantujuć», — adkazali ŭ paliklinicy.
Tolki ŭ troch ustanovach z tych 17 płatnaje KT jašče ŭ sile. Heta Haradskaja dziciačaja kliničnaja infiekcyjnaja balnica, balnica chutkaj miedycynskaj dapamohi i pryvatny miedcentr «Łade».
U dziciačaj infiekcyjoncy možna patrapić na KT na nastupnym tydni. U BCHMD taksama jość miescy na abśledavańnie na nastupny tydzień — zapis viaduć pa piatnicach. U «Łade» najbližejšy sieans — u kancy maja. Ceny ŭ dziaržustanovach udvaja nižejšyja.
Važnaja ŭmova: dla KT u lubym vypadku patrebna nakiravańnie ci rekamiendacyja doktara (daviedka, vydadzienaja ŭ pryvatnych centrach, taksama prymajecca).
Terapieŭt Natalla Kuźniacova pieraścierahaje: usim biehčy na kampjutarnuju tamahrafiju nie treba. Jana tłumačyć, u jakich vypadkach pryznačajecca heta abśledavańnie.
Pry zvyčajnych simptomach VRVI (nasmark, bol u horle, kašal, viałaść) pacyjentaŭ nakiroŭvajuć na fluarahrafiju. Kali aproč hetych simptomaŭ jość padazreńnie na karanavirus (naprykład, ciažkaje dychańnie, zadyška, łamota ŭ ciahlicach, haračka), rekamiendujuć KT.
KT u paraŭnańni ź fluarahrafijaj — bolš dakładny mietad dla vyznačeńnia pnieŭmanii.
«Renthien adstaje ad kliničnaj karciny prykładna na try dni. Byvaje, čuješ chrypy ŭ hrudziach, a na renthienie ich nie vidać», — zaŭvažaje doktarka.
Pnieŭmanija — heta ŭskładnieńnie paśla prastudy. Zapaleńnie lohkich zvyčajna padazrajuć, kali prastuda nie prachodzić tydzień, asabliva kali samaadčuvańnie pacyjenta paharšajecca. Tryvožny zvanočak — kali tempieratura nie źbivajecca haračkapanižalnymi lekami. Sama tempieratura pry hetym moža być ad 37,2 da 40 hradusaŭ.
Siarod simptomaŭ pnieŭmanii — bol u hrudziach, zadyška ŭ stanie spakoju, kašal paśla ŭdychu, pastajanny suchi kašal, mocny hałaŭny bol, patlivaść, aznob, zaŭvažnaja słabaść.
Natalla Kuźniacova kaža, što simptomy nie va ŭsich prajaŭlajucca jarka: tut ihraje rolu i ŭzrost čałavieka, i imunitet, i spadarožnyja zachvorvańni.
Nakiravańnie na KT, jak praviła, vydaje terapieŭt. Pry hetym doktar uzvažvaje ryzyki i časam adhavorvaje ad abśledavańnia.
«Usio ž taki pramianiovaja nahruzka — nie biaskryŭdnaja miera. Kali pry fluarahrafii ŭ paliklinicy apramieńvańnie — 0,18 m3v, to na KT — 2,5-3 m3v», — papiaredžvaje terapieŭt.
Jana źviartaje ŭvahu, što mietady pramianiovaha daśledavańnia nie źjaŭlajucca asnoŭnymi dla dyjahnostyki karanavirusnaj infiekcyi. Asnoŭny mietad — mazok.
