Halina Hrudskaja — byłaja staršynia suda Mastoŭskaha rajona. Ciapier joj 75 hadoŭ, jana ŭžo daŭno vyjšła ŭ adstaŭku.
Halinu Hrudskuju, jakaja adpačyvała ŭ sanatoryi pad Kamiancom, špitalizavali z karanavirusam. Ciapier žančyna ŭ reanimacyi balnicy Mastoŭ na aparacie štučnaj vientylacyi lohkich. Jaje syn upeŭnieny — mamu zarazili ŭ sanatoryi.
Fota Nadziei Bužan.
«Mama adpačyvała ŭ sanatoryi «Biełaja Vieža», heta pasiołak Pryaziorny Kamianieckaha rajona. Ja padumaŭ, što heta najlepšy varyjant schavać čałavieka ad karanavirusa: dziaržaŭnaja ustanova, jość miedpiersanał… — raskazvaje Ihar, syn Haliny Ivanaŭny.
— U druhoj pałovie sakavika pazvaniŭ u sanatoryj, raspytaŭ, jak abstanoŭka. Adkazali, što ŭsio dobra, prablem niama. Praz paru dzion ja pazvaniŭ im jašče raz — znoŭ kažuć, što ŭsio dobra. U vyniku 26 sakavika ja na mašynie pavioz tudy mamu».
Usio było narmalna, kaža Ihar, navat atrymałasia damovicca na asobny numar dla jaho mamy.
Ale 9 krasavika Halina Hrudskaja pazvaniła synu i paskardziłasia na tempieraturu. Pa jaje słovach, było 38,4.
«Joj kałoli «trajčatku», paśla antybijotyki. Ja pazvaniŭ u sanatoryj, kažu: zrabicie analiz na karanavirus. Mnie adkazvajuć, maŭlaŭ, niama mahčymaści. Kažu: zvanicie ŭ Brest, chaj adtul jeduć z analizam! — uzhadvaje Ihar. — U vyniku z Bresta pryjechali, analiz uziali.
13 krasavika mamu treba było zabirać. Analiz jašče nie byŭ hatovy. My prasili, kab jaje pakinuli ŭ sanatoryi, ale mamu vypisali. Nu i sama jana, jak usie babuli, zastavacca nie asabliva chacieła: pajechali dadomu, maŭlaŭ, tam raźbiaremsia.
Mamu ja zabraŭ. A na nastupny dzień telefanujuć z Bresta: analiz na karanavirus stanoŭčy».
Ihar upeŭnieny: Halinu Ivanaŭnu zarazili ŭ sanatoryi. Bolš niama dzie, śćviardžaje mužčyna.
«Da taho ž mama kazała, što kali jana była tam, u sanatoryi byli jašče ludzi z tempieraturaj. Ci rabili kamu ź ich analiz na «karonu» i što jon pakazaŭ — takoj infarmacyi ja nie maju», — kaža Ihar.
14 krasavika Halinu Hrudskuju zabrali ŭ balnicu Mastoŭ, na nastupny dzień pieraviali ŭ reanimacyju. Pa słovach syna, siońnia žančyna lažyć na ŠVŁ, jaje stan vielmi kiepski.
«Mnie taksama zrabili analiz, pratrymali try dni ŭ boksie, pakul nie pryjšoŭ vynik. Vynik admoŭny. Mianie adpuścili, ale ja padpisaŭ papieru ab samaizalacyi, ciapier my ŭsioj siamjoj na chatnim karancinie», — kaža Ihar.
Pretenzii ŭ mužčyny ŭ asnoŭnym da kiraŭnictva sanatoryja.
«Miascovyja ŭłady robiać što mohuć, da ich pytańniaŭ niama. Prosta nichto nie viedaje, jak z hetym zmahacca.
Ale što tam adbyłosia ŭ sanatoryi? Čamu dapuścili virus? Ja dumaju, prablema ŭ kiraŭnictvie sanatoryja. Moža, jany spałochalisia i nie paviedamili kudy treba, što ŭ ich uspyška — i majem toje, što majem, — miarkuje Ihar. — Nijaki Łukašenka nie vinavaty, choć jaho i plažać paŭsiul. Adzin čałaviek za ŭsioj miljonnaj krainaj sačyć nie moža. Prablema na miescach. Siadziać ludzi biez mazhoŭ, bajacca za svaje pasady i svaje hrošy, voś i ŭsio».
Pakul stan Haliny Hrudskaj zastajecca ciažkim. Pa słovach syna, doktar kaža, što «prahnoz — spadziavacca na lepšaje».
«Ale ja heta tak nie pakinu. Jak by ŭsio nie skončyłasia, ja ŭ lubym vypadku budu padavać u sud na sanatoryj»,— zapeŭnivaje Ihar.
Ciapier sanatoryj zakryty da 1 maja. Pra heta «Našaj Nivie» paviedamiła Luboŭ Łyščyk, markietołah «Biełaj Viežy»:
«Nie pracujem da 1 maja. Pryčyna? Takaja jak i va ŭsich astatnich, karanavirus».
Łyščyk paviedamiła, što pacyjentaŭ z tempieraturaj praviarali na karanavirus, ale vynikaŭ jana nie viedaje. Ale siońnia ŭ sanatoryi nichto nie adpačyvaje — apošni čałaviek vyjechaŭ 17 krasavika.