Miedsiastra Natalla Šmatko pracavała ŭ Minskaj balnicy chutkaj miedycynskaj dapamohi. Joj było 56 hadoŭ.
«Mama pracavała ŭ kabiniecie stamatałohii. U toj korpus amal što nichto nie chadziŭ, i jany staralisia asabliva nikudy nie vychodzić. Vytrymlivali ŭsie patrabavańni pa achovie pracy — maski nadziavali, palčatki», — raskazvaje syn Dzianis.
U piatnicu, 11 krasavika, u žančyny padniałasia tempieratura, paśla źjaviŭsia kašal. U paniadziełak Natallu pakłali u jaje ž balnicu.
«U toj ža dzień zrabili kampjutarnuju tamahrafiju i test na karanavirus. Pryjšoŭ stanoŭčy vynik. A na nastupny dzień uviečary mamu pieraviali na štučnuju vientylacyju lohkich», — kaža syn.
16 krasavika miedsiastru pieraviali ŭ reanimacyju 4-j haradskoj balnicy. U subotu zrabili pieralivańnie imunnaj płazmy, ale lepš žančynie nie stanaviłasia.
(Niekalki dzion tamu RNPC transfuzijałohii i miedycynskich technałohij paviedamlaŭ, što šukaje ludziej, jakija pierachvareli na karanavirus i hatovy stać donarami płazmy dla lačeńnia inšych pacyjentaŭ.)
20 krasavika žančyna pamierła. Zaklučeńnie ab śmierci siamji jašče nie vydali. Chavać miedsiastru buduć u zakrytaj trunie. Syn kaža, što ŭ maci nie było chraničnych zachvorvańniaŭ. Chiba tolki trochi cisk niepakoiŭ časam.
Natalla Šmatko — vieteran pracy. 38 hadoŭ jana addała miedycynie.
«Heta žyćciaradasny čałaviek i vydatny miedyk», — adhukajecca pra mamu syn.
Karanavirus vyjavili taksama ŭ jaje muža, jon ciapier znachodzicca ŭ balnicy z zapaleńniem lohkich. Stanoŭčy vynik i ŭ babuli Dzianisa, ale ŭ jaje simptomaŭ niama.
«My ciapier z babulaj udvaich žyviem u kvatery. Kožny dzień mierajem tempieraturu, pakul, zdajecca, usio dobra», — kaža chłopiec. U jaho samoha karanavirus nie paćvierdzili.
U balnicu siońnia pajechaŭ i brat Dzianisa. U jaho apošnija dni trymałasia pavyšanaja tempieratura, ale vyniki testa na karanavirus pakul nieviadomyja.
