Archiŭnaje fota, president.gov.by
Alaksandr Łukašenka nie bačyć padstaŭ dla pieranosu respublikanskaha subotnika, jaki maje prajści 25 krasavika. Pra heta kiraŭnik dziaržavy zajaviŭ siońnia žurnalistam padčas naviedvańnia babrujskaha pradpryjemstva «Słavianka», pieradaje BIEŁTA.
Na dumku kiraŭnika krainy, ciapier niama padstaŭ dla pieranosu abo admieny respublikanskaha subotnika. Jon adznačyŭ, što ludzi ŭsio adno pracujuć u piatnicu, i kali jany pryjduć na pracu ŭ subotu, to heta ni na što nie paŭpłyvaje.
«Tamu, kali ja prymaŭ hetaje rašeńnie, ja adnaznačna byŭ za subotnik. Tyja, chto pracujuć, — jany adpracujuć. My, čynoŭniki, viadoma, svaju zarpłatu taksama pieraličym u fond subotnika, bo heta śviataja sprava», — skazaŭ Alaksandr Łukašenka.
Sam kiraŭnik dziaržavy płanuje pravieści subotnik u rehijonie, paciarpiełym ad avaryi na Čarnobylskaj AES. U hadavinu trahiedyi jon zaŭsiody naviedvaje hetyja rajony, a ciapier zaadno zastaniecca i na subotnik. Razam z tym Łukašenka adznačyŭ, što kankretny nasieleny punkt jašče nie abrany. «Ja ŭ hety čas niekalki dzion budu žyć na poŭdni, i tam my što-niebudź znojdziem. Jaki-niebudź les pasadzim», — dadaŭ jon.
Sabranyja padčas respublikanskaha subotnika hrošy buduć nakiravanyja na ramont i madernizacyju dziciačych łahieraŭ, akulturvańnie vajennych pomnikaŭ, raspavioŭ Alaksandr Łukašenka. Jon rastłumačyŭ, što prapanoŭvałasia hetyja srodki ŭkłaści ŭ sistemu achovy zdaroŭja, ale hety kirunak budzie padtrymany za košt mižnarodnaj dapamohi.
Kiraŭnik dziaržavy zapeŭniŭ: kali situacyja z karanavirusam abvostrycca i buduć nieabchodnyja miery pa izalacyi ludziej, admienie masavych mierapryjemstvaŭ, takija kroki abaviazkova buduć pryniaty. Pakul u hetym niama nieabchodnaści, padkreśliŭ jon. «Kali ŭsio budzie tak, jak ciapier, my prarviemsia», — upeŭnieny jon.
