Sproba pieraniać dośvied Paŭdniovaj Karei razumnaja, ale dla jaho realizacyi patrebny adzin klučavy momant: vyčarpalnaje infarmavańnie hramadstva pra kožny kankretny vypadak, piša Andrej Jelisiejeŭ.
Na što spadziajecca Ministerstva achovy zdaroŭja Biełarusi ŭ baraćbie z karanavirusam? Faktyčna na karejskuju madel. Jana składajecca ŭ nastupnym: usieahulnyja karancinnyja miery i zabarony na pieramiaščeńni nie ŭvodziacca, zatoje dziejničaje dobra arhanizavanaja madel teściravańnia na karanavirus razam z efiektyŭnaj izalacyjaj tych, chto zachvareŭ, a taksama vysočvańnie i adpraŭka na karancin ich kantaktaŭ.
Jak pakazaŭ vypadak Paŭdniovaj Karei, hetaja stratehija realna dziejsnaja (praŭda, škoły jak minimum tam usio ž začynili) pry vykanańni važnych umoŭ. Na žal, u Biełarusi klučavaja ź ich adsutničaje, pra heta nižej.
Paŭdniovaja Kareja sapraŭdy ździviła, uziaŭšy pad kantrol epidemiju, jakaja ŭ siaredzinie lutaha raptam vyjšła z-pad kantrolu. Situacyja raźvivałasia nastupnym čynam: na praciahu pieršaha miesiaca byli vyjaŭlenyja ŭsiaho 30 vypadkaŭ zaražeńnia i nivodnaj śmierci. Na praciahu nastupnych 10 dzion kolkaść vyjaŭlenych vypadkaŭ uzrasła da 2300(!) z-za adnoj sacyjalna aktyŭnaj žančyny, jakaja zaraziła dziasiatki čałaviek. Na datu 30 sakavika było ŭstanoŭlena amal 10 tysiač vypadkaŭ zaražeńnia, 158 śmierciaŭ. I heta paraŭnalna nizki pakazčyk, uličvajučy rezki rost u siaredzinie lutaha, jaki pieršapačatkova zaśpieŭ karejski ŭrad źnianacku.
Vuličny punkt ekspres-teściravańnia na karanavirus u Pusanie (Paŭdniovaja Kareja)
Ale jon chutka zaryjentavaŭsia i adyhraŭ, abapirajučysia na navukovyja pošuki i zdarovy sens.
U Karei, pa-pieršaje, teściravańnie našmat bolš masavaje, u toj čas jak u Biełarusi paviedamlajecca pra składanaści ź jaho prachodžańniem.
Pa-druhoje, tam testy vydajuć dakładny vynik ź vierahodnaściu 98%, a ŭ nas pastajanna paviedamlajuć pra supiarečlivyja vyniki.
Pa-treciaje, tam maje miesca efiektyŭnaja izalacyja tych, chto zachvareŭ i, jak miarkujecca, zaraziŭsia. A pracuje heta tolki tady, kali jość vysoki ŭzrovień davieru pamiž nasielnictvam i ŭładami. Na heta, darečy, užo nieadnarazova skardzilisia biełaruskija čynoŭniki. Maŭlaŭ, ludzi ŭtojvajuć infarmacyju pra toje, z kim kantaktavali i kali.
Dyk kali ŭ Biełarusi Ministerstva achovy zdaroŭja viaščaje, što pacyjentaŭ z karanavirusam z aparatami štučnaj vientylacyi lohkich u krainie niama, a jany sapraŭdy jość, kali realnaja statystyka zamoŭčvajecca, a adkazy na surjoznyja pytańni — biednyja, śmiešnyja abo zusim adsutničajuć, kali dziaržtelekanały i kiraŭnik vyśmiejvajuć virus jak bajku i «psichoz», to pra jaki ŭzajemny davier moža iści havorka?..
Voś što skazała ministr zamiežnych spraŭ Karei z hetaj nahody: «Kluč da našaha pośpiechu [u baraćbie z karanavirusam] — u absalutnaj adkrytaści z hramadskaściu: infarmavańnie pra kožnuju detal z nahody raźvićcia virusa, jaho raspaŭsiudžvańnia i dziejańniaŭ urada».
To-bok Biełaruś pieršapačatkova naceliłasia na tearetyčna dziejsnuju stratehiju. Ale jana nie spracavała jak treba, łancužok zaražanych stračany. Sprava ŭ tym, što ŭłady nie nastroili hramadskaść na surjoznaje staŭleńnie da virusa i atrucili klučavy inhredyjent hetaj stratehii — davier hramadskaści.
Heta toje, pra što ŭčora ŭ svajoj publikacyi raspavioŭ Frensis Fukujama: pośpiech supraciŭlalnaści krainy da karanavirusa vyznačajecca adnoj važnaj rečču, niezaležnaj ad typu palityčnaha režymu (demakratyja ci aŭtarytaryzm), — davieram hramadstva da ŭładaŭ. Jaho ŭ Biełarusi niama.
