Aficyjny Minsk prosić aficyjnuju Vilniu pieradać Biełarusi dakładnyja źviestki pra niejkija «peŭnyja ačahi na biełaruskaj terytoryi i vypadki śmierci». Kali, viadoma, takija źviestki ŭ Litvy majucca nasamreč. Tak u MZS Biełarusi prakamientavali zajavu prezidenta Litvy, a raniej i kiraŭnika MZS susiedniaj krainy pra toje, što nielha daviarać aficyjnaj infarmacyi Biełarusi ab karanavirusie: situacyja ŭ krainie značna horšaja, čym paviedamlajuć biełaruskija ŭłady, paviedamlaje Tut.by.
Nahadajem, prezident Litvy Hitanas Naŭsieda zajaviŭ: całkam mahčyma, što sapraŭdnaja statystyka ŭ Biełarusi pa zachvorvańniach COVID-19 značna horšaja.
Prezident Litvy: Nielha daviarać aficyjnaj infarmacyi ź Biełarusi pra karanavirus. Situacyja tam značna horšaja
— Pakolki my viedajem pra peŭnyja ačahi na biełaruskaj terytoryi i vypadki śmierci, — skazaŭ Naŭsieda.
U MZS zajaŭlajuć, što Biełaruś užo bolš za dva tydni dapamahaje litoŭcam z usiaho śvietu viarnucca dadomu. Tamu zajavy aficyjnaj Vilni ŭ Minsku nie razumiejuć.
— Vy viedajecie, u dadzienaj situacyi na rozum adrazu prychodzić fraza z adnaho viadomaha multfilma: «Kto ludiam pomohajet — tot tratit vriemia zria, chorošimi diełami prosłaviťsia nielzia…»
Hetak ža i ŭ hetym vypadku. Bo pačynajučy z 16 sakavika Biełaruś daje adnu ź niešmatlikich mahčymaściaŭ dla dastaŭki dadomu litoŭskich hramadzian. Dziakujučy zachavańniu rejsaŭ «Biełavija» za hety pieryjad kala 500 litoŭcaŭ viarnulisia na Radzimu, prytym biez afarmleńnia viz. Jak skłaŭsia b ich los, kali b nie było hetaj mahčymaści, nieviadoma. Pa fakcie rejs na 80 adsotkaŭ słužyć mienavita hetaj mecie. Navat siońnia kala 20 litoŭcaŭ projduć hetym maršrutam, — skazaŭ TUT.BY pres-sakratar MZS Anatol Hłaz.
U MZS zajaŭlajuć: na hetym fonie zusim niezrazumieła pra jaki «niedavier» kazali prezident i ministr zamiežnych spraŭ Litvy. Lubyja zajavy padobnaha rodu pavinny hruntavacca na dakładnaj infarmacyi i faktach, a nie na domysłach i čutkach.
— Tamu my byli b udziačnyja litoŭskamu boku za pieradaču nam dakładnych źviestak pra niejkija «peŭnyja ačahi na biełaruskaj terytoryi i vypadki śmierci». Kali, viadoma, takija źviestki ŭ jaje majucca nasamreč, — kaža Hłaz.
Pradstaŭnik MZS dadaje: anałahičnaja situacyja i z acenkami pracy biełaruskaj sistemy achovy zdaroŭja. Karektna, kali ich dajuć prafiesijanały.
— Ale ŭ hetym vypadku my pačuli tradycyjnyja sproby našych susiedziaŭ padmianiać saboj kampietentnyja mižnarodnyja arhanizacyi. A nieadnarazovyja vysnovy śpiecyjalistaŭ SAAZ, u tym liku ŭ kantekście mier, što prymaje naša kraina, nie źjaŭlajucca sakretam. Pry nieabchodnaści my hatovyja dadatkova aznajomić ź imi litoŭskaje kiraŭnictva.
Kantrol nad situacyjaj, samavałodańnie, dalejšaje zabieśpiačeńnie mier pa spynieńni raspaŭsiudžvańnia pandemii, u tym liku praz efiektyŭnaje mižnarodnaje ŭzajemadziejańnie, — heta toje, u čym my ŭsie zaraz asabliva majem patrebu. Zaklikajem našych litoŭskich kaleh prytrymlivacca pierš za ŭsio hetych pryncypaŭ, — zajaŭlajuć u MZS.
