«Ja doktarka, pracuju ŭ Viciebsku ŭ balnicy chutkaj miedycynskaj dapamohi. U našym horadzie situacyja pačała vychodzić z-pad kantrolu! Miedyki chutka nie buduć davać rady napłyvu chvorych. Šmat daktaroŭ znachodzicca ŭ balnicach z zapaleńniem lohkich! Raspaŭsiudźcie hetuju infarmacyju ŭ sacyjalnych sietkach. Ličby, tyja, što padajuć u SAAZ, absalutna mifičnyja», — napisała 30 sakavika na svajoj staroncy «UKantakcie» Natalla Łaryjonava.
Natalla — doktarka łabaratornaj dyjahnostyki Viciebskaj haradskoj kliničnaj balnicy chutkaj miedycynskaj dapamohi z 25-hadovym stažam. Na ciapierašnim miescy raboty jana pracuje ŭžo 18 hadoŭ.
«Narodnym navinam Viciebska» Natalla Łaryjonava paviedamiła, što jaje post vyklikany «stracham za kaleh i žycharoŭ našaj krainy»: «apošnim časam stali vybyvać daktary-reanimatołahi. Pa siarednim miedpiersanale ja nie ŭ kursie, ale tam, napeŭna, usio idzie jašče horš».
«Kali dalej tak pojdzie, dumaju, my zachłyniomsia», — miarkuje lekarka.
Siarod zaražanych miedykaŭ u Viciebsku jość i supracoŭniki chutkaj dapamohi, jakija raniej pracavali bieź nieabchodnych srodkaŭ indyvidualnaj abarony.
Na dumku Natalli Łaryjonavaj, kab uziać situacyju z epidemijaj pad kantrol, ułady pavinny ŭvieści karancin:
— U Viciebsku i Biełarusi pavinny ŭvieści tyja ž miery abmiežavańnia, što ciapier uviedzienyja ŭ Italii. Tolki takim čynam, pa-mojmu, my zmožam paźbiehnuć toj žachlivaj karciny, jakaja ciapier nazirajecca ŭ hetaj krainie.
Paźniej na svajoj staroncy ŭ sacsietcy Natalla Łaryjonava napisała padziaku ŭsim, chto jaje padtrymlivaje: «Dobry dzień, maje dobryja ludzi! Stolki ciapła i padtrymki atrymała ad vas, i paradaŭ, jak zachavać svaju biaśpieku. Bo ja — zvyčajny čałaviek i paru dzion tamu navat i nie dumała, što zdolnaja na heta. Vielmi ŭdziačnaja baćkam škoły, u jakoj vučycca moj syn, za padtrymku. Jany i maje siabry-daktary, moj lubimy kalektyŭ łabaratoryi natchnili mianie zrabić post pra situacyju ŭ krainie».
Namieśnik hałoŭnaha doktara Viciebskaj BSMP Alaksandr Vińnikaŭ paviedamiŭ TUT.BY, što «pazicyja Natalli Łaryjonavaj — heta pazicyja nie kalektyvu BSMP, nie daktaroŭ BSMP, a tolki pryvatnaje mierkavańnie hetaj supracoŭnicy. Majo asabistaje mierkavańnie nakont hetaha: nie treba ratavać śviet, ciapier prosta kožny doktar pavinien vyrazna spracavać na svaim pracoŭnym miescy — i tady ŭsim budzie dobra».
U toj ža čas namieśnik hałoŭnaha doktara zapeŭniŭ, što da Natalli Łaryjonavaj za jaje publičnuju pazicyju nie budzie pryniata nijakich mier. «A za što? Pracoŭnuju dyscyplinu śpiecyjalist nie parušaje. A toje, što jana vykazvaje ŭ internecie svaje emocyi, pieražyvańni — heta jaje prava», — skazaŭ doktar Vińnikaŭ.
31 sakavika ŭłady paćvierdzili śmierć zasłužanaha artysta Biełarusi, akciora viciebskaha Teatra imia Jakuba Kołasa 75-hadovaha Viktara Daškieviča. U jaho byŭ vyjaŭleny karanavirus. Teatr spyniŭ śpiektakli. Pavodle infarmacyi ŭdavy Daškieviča, pa mienšaj miery, u piaci supracoŭnikaŭ teatra zapaleńnie lohkich, ich špitalizavali.
Akramia taho, jašče dźvie siamji ź Viciebska zajavili, što ich rodnyja — 73-hadovaja Alaksandra Čepik i 58-hadovaja Taćciana Chuziejeva — pamierli, budučy špitalizavanyja ź ciažkimi pnieŭmanijami. Abiedźvie siamji śćviardžajuć, što im telefanavali sansłužby i paviedamlali pra stanoŭčyja proby na karanavirus. U dačynieńni da Chuziejevaj Ministerstva achovy zdaroŭja paźniej abvierhła hetuju infarmacyju.
Na žal, aficyjnaja infarmacyja pra kolkaść pacyjentaŭ z dyjahnazam «pnieŭmanija» u Viciebsku i vobłaści nie publikujecca. Pryvatnym čynam miedyki kažuć pra toje, što pacyjentaŭ z zapaleńniem lohkich u horadzie našmat bolš, čym zvyčajna ŭ hety čas hoda.
Alaksandr Łukašenka 31 sakavika na sustrečy sa staršynioj Savieta Respubliki Natallaj Kačanavaj pryznaŭ, što ŭ Viciebskaj vobłaści nazirajecca ŭsplosk zachvorvańniaŭ, ale nie źmianiŭ svajho staŭleńnia da pandemii.
«Vy ŭ mianie čałaviek mužny. Sałdat taki, što i ŭ vychadnyja adpracavali ŭ prablemnym rehijonie, rodnaj svajoj vobłaści. Ja nie kažu, što tam katastrofa niejkaja, nie. Prosta Viciebskaja vobłaść u nas zaŭsiody, i pa klimacie inšaja, i trochi zrušyŭsia hety pik zachvorvańnia. Siońnia tam pracuje ministr achovy zdaroŭja, ja nakiroŭvaŭ jaho tudy i śpiecyjalistaŭ, kab jany źviarnuli ŭvahu, praanalizavali i zrabili vysnovy».
U svaju čarhu, Kačanava zajaviła: «Situacyja absalutna kiravanaja. Daktary razumiejuć, što treba rabić».
Zapis Natalli Łaryjonavaj «UKantakcie» sabraŭ bolš za 1700 repostaŭ i tysiačy łajkaŭ. Tolki na staroncy samoj doktarki jaho pračytała pa mienšaj miery 137 tysiač karystalnikaŭ, nie ŭličvajučy pieradrukaŭ.
