1 krasavika ŭ sacsietkach źjaviłasia zusim nie žartaŭlivaje videa. Na im Natalla Zajac z Salihorska abvinavačvaje ŭłaśnika «Darydy» miljaniera Uładzimira Dzialendzika ŭ sprobie rejdarskaha zachopu biznesa siamji Zajcaŭ, a taksama ŭ šmatlikich pahrozach.
Natalla — žonka Andreja Zajca, salihorskaha biznesmiena, jaki stvaryŭ Handlovy dom «Raduha-śviet». Jon maje sietku kramaŭ i restaranaŭ u roznych haradach Biełarusi.
Pa słovach Natalli Zajac, ciapier Uładzimir Dzialendzik pahražaje jaje siamji: nibyta patrabuje, kab jaje muž pierapisaŭ majomaść i biznes na dačku Dzialendzika, jakaja žyvie ŭ Ispanii.
«Kali vy hladzicie hetaje videa, to, vierahodna, mianie i majoj siamji ŭžo niama», — kaža na videa Natalla Zajac.
Praŭda, z Zajcami ŭsio narmalna. Jany navat sustrelisia ź Dzialendzikam u Salihorsku. Praŭda, sustreča skončyłasia krykami i skandałam.
Ale ž u čym sutnaść kanfliktu?
«Naša Niva» pasprabavała atrymać kamientar Andreja i Natalli Zajcaŭ. Ale salihorski biznesmien skidvaje ŭsie zvanki.
U svaju čarhu Uładzimir Dzialendzik achvotna raspavioŭ svaju viersiju.
«Dva hady tamu ja ŭvajšoŭ u biznes Zajca, pryčym pa jaho prośbie. Ja nabyŭ 50% akcyj kampanii. Ukłaŭ 10,3 miljona jeŭra. Tady jaho biznes byŭ zakredytavany: sietka kaštavała maksimum 11 miljonaŭ, kredytaŭ na im było kala 9 miljonaŭ. Kali ja ŭkłaŭ hrošy, my pahasili pałovu kredytaŭ i dabudavali niekatoryja kramy.
Uładzimir Dzialendzik, fota Nadziei Bužan
Ale spadar Zajac pačaŭ zajmacca roznaj kałamutaj. Ja chacieŭ uvieści ŭ kampaniju svajho finansista, ale Zajac, jak hienieralny dyrektar, byŭ suprać. Tady ja napisaŭ zajavu, što bolš nie chaču być akcyjanieram, maŭlaŭ, viartaj maje hrošy. Zajac pasprabavaŭ, ale nie zmoh znajści hrošy. Tady skazaŭ mnie, maŭlaŭ, davaj dalej raźvivać sietku. Ja pahadziŭsia.
Praź miesiacy try-čatyry Zajac znoŭ pačaŭ rabić nie toje, što treba. Ja znoŭ napisaŭ, što vyjdu sa składu zasnavalnikaŭ. Zajac pačaŭ šukać hrošy, kab viarnuć mnie. Acaniŭ svoj biznes — sietka kaštavała 14 miljonaŭ jeŭra prykładna, mnie jon byŭ vinien 11 miljonaŭ, jašče kala 4 miljonaŭ vinien banku».
Pa słovach Dzialendzika, Zajac zrazumieŭ, što viarnuć hrošy nie zmoža i prapanavaŭ usio ž niejak pamirycca. Tady Dzialendzik prapanavaŭ svoj varyjant.
«Ja skazaŭ: davaj akcyjami! Jon padpisaŭ: 15% jaho, maich ciapier stała 85%. A žoncy Zajac schłusiŭ.
U vyniku ja vyrašyŭ pasadzić na pasadu dyrektara inšaha čałavieka, a Zajca źniać. I pačałosia toje, što pačałosia, nibyta ja chaču «zachapić ich biznes» — raspaviadaje Uładzimir Dzialendzik. —
Siońnia ja byŭ u Salihorsku, sustrakaŭsia z Zajcam. Jany tam sabrali ludziej, nakrucili ich, ludzi ŭ ataku pajšli na mianie: vy pryjechali rejdarski zachop rabić! A ja razmaŭlać pryjechaŭ!
Paśla ŭvohule Natalla Zajac uvarvałasia ŭ kabiniet, pabiłasia z načalnikam słužby achovy, złamała jamu skivicu! Pravakavała mianie, chacieła, kab jaje ŭdaryŭ, kryčała: «Ja tabie tvar padrapaju!» Ja kažu: «Drapaj!» Zatym mianie nie vypuskali z kabinieta, ja vyklikaŭ milicyju, paviedamiŭ, što nie dajuć mnie vyjści.
Mianie na sustrečy pačali presavać, ja im adkazvaju: vaša sietka kramaŭ mnie nie patrebnaja! Ja paŭtorna napisaŭ, što vychodžu ź biznesa, i chaj da 30 červienia Zajac viernie mnie ŭsie hrošy. Razmova idzie pra 11 miljonaŭ jeŭra. Jak jon heta zrobić, ja nie viedaju, u jaho hrošaj niama.
Ale ciapier ja budu źviartacca ŭ DFR i inšyja instancyi, kab pravieryli dziejnaść spadara Zajca. I kab pravieryli, ci byŭ niejki rejdarski zachop.
Taksama Natalla Zajac zapisała toje videa, u jakim śćviardžaje, što ja chaču jaje z mužam vykinuć z krainy i pahražaju zarazić karanavirusam! U adkaz ja napisaŭ zajavu ŭ milicyju praz hetyja jaje zajavy.
Voś takaja situacyja. Ale niezrazumieła, čamu Natalla Zajac tak siabie pavodzić. Kali byŭ rejdarski zachop, to čamu jana nie pajšła ŭ milicyju, a pačała zapisvać videaroliki i sprabavać mianie dyskredytavać?»
Paźniej «Naša Niva» źviazałasia z Natallaj Zajac, ale jana zajaviła, što nie budzie davać kamientar, bo joj nie pasuje takaja «schiema pracy»:
«Ja b chacieła pahavaryć nie pa telefonie, a sklikać pres-kanfierencyju. Ja nie viedaju, ci vy na baku Dzialendzika, ci niezaležnyja žurnalisty. A adkazvać na vykazvańni Dzialendzika ja nie budu. Kali vy chočacie apublikavać punkt hledžańnia Dzialendzika, a paśla moj — takoha nie budzie!»
