Usio bolš navinaŭ pra toje, što asobnyja kampanii pierachodziać na dystancyjny režym pracy. Łahičnaje pytańnie, a jak ža być ź dziećmi, jakija naviedvajuć sady i škoły. Niekatoryja baćki ŭ sacyjalnych sietkach usurjoz abmiarkoŭvajuć mahčymaść pakinuć dziaciej doma. Pakul pišuć zajavy na dzień-dva — «pa siamiejnych abstavinach». Na heta kiraŭnictva škoł hladzić z razumieńniem, piša kp.by.
Praŭda, niekatoryja hatovyja z nastupnaha tydnia pakinuć doma svajo dzicia na bolšy termin. Kažuć navat pra niapeŭny pieryjad — pakul pahroza karanavirusa nie sydzie. Baćki spasyłajucca na źviestki Suśvietnaj arhanizacyi achovy zdaroŭja ab pandemii, a svaje dziejańni nazyvajuć sacyjalnym karancinam. Tut dyrekcyja ŭstanovy adukacyi nie śpiašajecca z rašeńniem, maŭlaŭ, a jak ža być z navučalnym pracesam?
«Kamsamołka» zapytałasia ŭ pres-sakratara Ministerstva adukacyi Ludmiły Vysockaj, jak dziaržorhan stavicca da takich situacyj. I ci jość na hety kont niejkija rekamiendacyi kiraŭnictvu škoł, upraŭleńniam i adździełam adukacyi?
— Rekamiendacyja z boku ministerstva moža być adna: kali ŭ dziaciej jość kankretnyja simptomy prastudnaha zachvorvańnia, drennaje samaadčuvańnie, pavyšanaja tempieratura, to, viadoma, naviedvać navučalnuju ŭstanovu dziciaci nie treba. Tut rašeńnie adno: vyklikać doktara i iści pa daviedku.
Ale inšych pakazańniaŭ, kab dzieci siadzieli doma, a nie išli ŭ škołu abo ŭ dziciačy sad, niama. Jany ž buduć prapuskać zaniatki, parušycca navučalny praces, — tłumačyć Ludmiła Juljanaŭna.
— U asablivych, vyklučnych vypadkach, viadoma, možna napisać zajavu i pakinuć dzicia doma pa siamiejnych abstavinach. Ale na peŭny termin, jaki padkažuć u administracyi škoł. Pa vialikim rachunku, padobnyja pytańni z naviedvalnaściu ŭrokaŭ uźnikajuć štohod u suviazi ź siezonnaj zachvaralnaściu. I, napeŭna, ahulnaja parada dla baćkoŭ: nie treba panikavać.
