Minčuk Jaŭhien Žuraviel niekalki hadoŭ supracoŭničaje ź Vialikim teatram u kitajskim Charbinie, niadaŭna pryznačany namieśnikam hienieralnaha dyrektara. Adnak ad kanca minułaha hoda praz epidemiju karanavirusa ŭsie prajekty zhornutyja. Sam jon z žonkaj Alaksandraj i synam Płatonam čakajuć dobrych navin u Biełarusi.
Hastroli skasavanyja abo pieraniesienyja
Jaŭhienu 34 hady, jon syn narodnaha artysta Biełarusi Siarhieja Žuraŭla, jaki ŭ žniŭni 2015-ha dačasna syšoŭ z žyćcia. Maci — artystka teatra i kino Valeryja Lichadziej. Chłopiec vyras u teatralnym asiarodku, ale dla siabie abraŭ nie artystyčny kirunak, a mieniedžarski. Skončyŭ Sankt-Pieciarburhskuju dziaržaŭnuju akademiju teatralnaha mastactva, pracavaŭ zahadčykam pastanovačnaj častki Teatra imia Janki Kupały.
U Kitaj prylacieŭ 3,5 hoda tamu — zaprasili ŭ jakaści techničnaha dyrektara ŭ Vialiki teatr Ciańczinia i Vialiki teatr Charbina. Kaža, što pieršyja paŭtara hoda sumiaščaŭ pracu adrazu ŭ dvuch miescach. Adnak ciapier skancentravany na dziejnaści Charbinskaha teatra, dzie jon ad niadaŭniaha času zajmaje pasadu namieśnika hienieralnaha dyrektara.
Sam teatr źjaŭlajecca bazavaj placoŭkaj dla kampanii Propel performing arts and media Co., biełarus tam hetaksama na vysokich pazicyjach — vice-prezident. Hetaja kampanija zajmajecca, z adnaho boku, arhanizacyjaj hastrolaŭ suśvietna viadomych teatralnych kalektyvaŭ, a ź inšaha — pradziusiruje ŭłasnyja prajekty i pastanoŭki. Biznes-mieniedžaram u teatry pracuje i Alaksandra Žuraviel, žonka Jaŭhiena. Zajmajecca ŭnutranymi pracesami, nie źviazanymi sa scenaj.
Pavodle Jaŭhiena, u apošnija hady ŭ Kitai sapraŭdny bum cikavaści da teatralnaj kultury, zapatrabavanaść u pryjeździe najlepšych trup śvietu nadzvyčajnaja. Niemałavažna, što hrošy na heta traciacca vialikija, tamu supraca vyhadna ŭsim bakam. Darečy, niekalki hadoŭ tamu ŭ Piekinie hastralavaŭ Kupałaŭski teatr, u jakim praciahły čas pracavaŭ i jahony baćka Siarhiej Žuraviel.
«Poŭnaściu adčuć atmaśfieru karanavirusa mnie, na ščaście, nie ŭdałosia, — kaža Jaŭhien. — Tak zdaryłasia, što ŭ kancy śniežnia ja ź siamjoj prylacieŭ u Miensk na vakacyi — i voś da hetaha času nie mahu viarnucca ŭ Kitaj. Tamu pakul što zastajusia ŭ Biełarusi. Jak tolki situacyja stabilizujecca — adrazu nazad. Vielmi šmat pracy, mnohija prajekty harać! Śpiektakli, hastroli daviałosia admianić abo pieranieści. Spadziajusia, hety kašmar chutka skončycca».
Z apoviedaŭ kaleh, jakija ciapier faktyčna błakavanyja ŭ Kitai, Jaŭhien Žuraviel robić vysnovu, što da stabilizacyi jašče daloka. Luboje pieramiaščeńnie pa horadzie — tolki pa admysłovych propuskach, navat u kramu pa pradukty. I heta zasmučaje: synu Płatonu treba viartacca ŭ škołu, jamu i žoncy — na słužbu ŭ teatr.
«Što tyčycca ŭpłyvu karanavirusa na žyćcio ŭ Kitai, to ŭsio vielmi sumna i navat strašna — kali mieć na ŭvazie, jakoj kolkaści ludziej heta tyčycca, — praciahvaje surazmoŭca. — Usiudy abjaŭleny karancin. Kampanii, pradpryjemstvy, zabaŭlalnyja ŭstanovy nie pracujuć, usio začyniena. Vychad z domu tolki pa śpiecyjalnym propusku. Kožnaj siamji vydali taki dazvoł, chtości adzin z čalcoŭ moža vychodzić z domu pa pradukty, ale nie bolš za dva razy na tydzień».
Teatralny karancin padoŭžany
Tym nie mienš, jak adznačaje Jaŭhien Žuraviel, asobnyja pravincyi hatovyja krychu asłabić žorstkija abmiežavańni, uviedzienyja ad pačatku hoda. Pieradusim heta tyčycca samoha horada Charbin i pravincyi Chejłunczian.
Voś papiaredni hrafik pastupovaha vychadu z karancinu, jaki biełaruski mieniedžar atrymaŭ dla aznajamleńnia. Praŭda, asabista dla jaho pakul što ničoha suciašalnaha — teatralnaje žyćcio pa-raniejšamu paralizavanaje.
— ad 17 lutaha karancin zdymajecca z roźničnych kramaŭ, hatelaŭ i pradpryjemstvaŭ hramadskaha charčavańnia, a taksama łahistyčnych kampanij, jakija absłuhoŭvajuć pramysłovyja abjekty.
— ad 24 lutaha mohuć vychodzić na pracu supracoŭniki finansavaj haliny i ryełtarskaha biznesu.
— ad 2 sakavika raniejšyja abmiežavańni anulujucca dla deviełapierskich i navukova-techničnych kampanij.
Pry hetym na niavyznačany termin prypyniajecca dziejnaść kampanij, jakija zajmajucca kamiercyjnymi pieravozkami, a taksama:
— teatraŭ, kinateatraŭ i inšych zabaŭlalnych ustanoŭ
— muziejaŭ, mastackich halerej, vystavačnych centraŭ
— turystyčnych ahienctvaŭ
— aptovych rynkaŭ, uklučna z čajnymi i kvietkavymi
— nievialikich kramaŭ.
Tempy zaražeńnia źnižajucca
Peŭnyja spadzievy na narmalizacyju sytuacyi dajuć dadzienyja manitorynhu Nacyjanalnaj kamisii zdaroŭja Kitaja, jakija śviedčać, što kolkaść novych vypadkaŭ zaražeńniaŭ karanavirusam COVID-19 padajuć niekalki dzion zapar.
Akramia taho, abnadziejvaje kolkaść tych, kaho ŭdałosia vylečyć — 17 lutaha krychu bolš za 100 čałaviek pamierli, ale 1425 pacyjentaŭ byli vypisanyja zdarovymi, a jašče 28 179 pacyjentaŭ vypisali z-pad abaviazkovaha miedycynskaha nazirańnia.
Suśvietnaja arhanizacyja zdaroŭja hetaksama adznačaje, što za minuły dzień COVID-19 nie vyjaŭlali ŭ novych krainach. Praŭda, zafiksavali treciuju śmierć ad nastupstvaŭ karanavirusa za miežami Kitaja: kitajskaja turystka pamierła ŭ Francyi. Dahetul śmiarotnyja vypadki fiksavalisia ŭ Japonii i na Filipinach.
Ahułam za ŭvieś čas kitajskija miedyki atrymali paćvierdžańnie 70 548 zaražeńniaŭ karanavirusam i 1770 śmierciaŭ ad chvaroby, a taksama 10 844 vypadkaŭ vyzdaraŭleńnia. U ciažkim stanie zastajucca 10 644 chvoryja, ale ich lik źmienšyŭsia na 628 čałaviek za dzień.
