17 lutaha nie stała 35-hadovaha ksiandza, administratara parafii ŭ Navajelni (Dziatłaŭski rajon) Paŭła Barysieviča. U suchich paviedamleńniach nie nazyvalisia pryčyny śmierci maładoha śviatara. «NN» vyśvietliła, što zdaryłasia.
Ajciec Pavieł Barysievič byŭ rodam sa Starych Vasilišak Ščučynskaha rajona. 10 krasavika jamu b spoŭniłasia 36 hadoŭ. Śviatarskaje paśviačeńnie Barysievič pryniaŭ u listapadzie 2010 hoda z ruk biskupa Hrodzienskaj dyjacezii Alaksandra Kaškieviča.
Paśla hetaha małady śviatar byŭ nakiravany vikaryjem u parafiju śviatoha Juzafa ŭ Hrodnie, taksama niadoŭhi čas byŭ vikaryjem u Ašmianach. U Navajelni ajciec Pavieł słužyŭ ad 2015 hoda.
Pres-sakratar hrodzienskaj kuryi ksiondz Juryj Marcinovič paviedamiŭ «NN», što pryčynaj śmierci stała pnieŭmanija. «Ajciec Pavieł pamior u ščučynskaj balnicy», — adznačyŭ śviatar.
Probašč parafii Uniebaŭziaćcia najśviaciejšaj Panny Maryi ŭ Dziatłavie Ździsłaŭ Pikuła kaža, što ŭ ajca Barysieviča byli daŭnija prablemy sa zdaroŭjem. «Jon nieadnarazova lažaŭ u balnicy ŭ Minsku z nahami», — kaža ajciec Pikuła.
Hałoŭny doktar Ščučynskaj rajonnaj balnicy Ivan Zaharoŭski admoviŭsia raskazvać padrabiaznaści zachvorvańnia, spasłaŭšysia na miedycynskuju tajamnicu.
Pavieł Barysievič budzie pachavany 19 lutaha na parafijalnych smohiłkach u Starych Vasiliškach. Raźvitalnaja imša adbudziecca a 12-j hadzinie.