Sud u Pienzie siońnia abviaściŭ prysud abvinavačanym pa spravie tak zvanaj terarystyčnaj supolnaści «Sietka». Jany prysudžanyja da doŭhich terminaŭ źniavoleńnia, pieradaje www.svoboda.org.
Padsudnyja nie pryznajuć vinu. Mnohija ź ich śćviardžajuć, što davali pryznalnyja pakazańni pad katavańniami.
Pakarańnie, jakoje pryznačyŭ sud, praktyčna supała z tym, što zapytvała prakuratura. Dźmitryj Pčalincaŭ prysudžany da 18 hadoŭ pazbaŭleńnia voli ŭ kałonii strohaha režymu. Illa Šakurski atrymaŭ 16 hadoŭ, Andrej Čarnoŭ — 14, Maksim Ivankin — 13, Michaił Kulkoŭ — 10, Vasil Kuksaŭ — 9, Arman Sahynbajeŭ — 6 hadoŭ pazbaŭleńnia voli.
Padsudnyja — antyfa-aktyvisty i anarchisty. Ich pryznali vinavatymi ŭ arhanizacyi dziejnaści terarystyčnaj supolnaści abo ŭdziele ŭ joj. Niekatorych taksama ŭ zachoŭvańni zbroi i zamachu na zbyt narkotykaŭ.
Pa viersii śledstva, maładyja ludzi stvaryli sietkavuju supolnaść z metaj ździajśnieńnia teraktaŭ i źviaržeńnia ŭłady. Jašče niekalki čałaviek pa hetaj spravie byli aryštavanyja ŭ Sankt-Pieciarburhu.
Pčalincava i Šakurskaha FSB nazyvaje stvaralnikami «Sietki». Śledstva śćviardžaje, što jany rychtavali «bajavyja hrupy», u pryvatnaści, dla ździajśnieńnia teraktaŭ padčas čempijanatu śvietu pa futbole.
Padsudnyja zajaŭlajuć pra svaju nievinavataść. Jany śćviardžajuć, što nie płanavali terakty i nie stvarali arhanizacyju. Śledstva pa spravie viali supracoŭniki FSB. Śledčy kamitet nie znajšoŭ u ich dziejańniach ničoha supraćpraŭnaha. Pravaabarončy centr «Miemaryjał» unios abvinavačanych pa spravie «Sietki» ŭ śpis palityčnych źniavolenych.
