Praceduru pryjomu zamiežnikaŭ u hramadzianstva Rasii istotna sprościać, piša «Kamiersant». Atrymać rasijskaje hramadzianstva možna budzie, nie admaŭlajučysia ad užo najaŭnaha inšaha hramadzianstva. Adpaviednyja źmieny ŭ zakon «Ab hramadzianstvie RF» rychtuje ŭrad. Zakonaprajekt mohuć unieści ŭ Dziarždumu ŭžo ŭ hetym miesiacy.
Pra padrychtoŭku ŭradam zakanadaŭčych źmienaŭ, jakija spraščajuć hramadzianam inšych dziaržaŭ atrymańnie hramadzianstva RF, «Kamiersantu» raspaviali surazmoŭcy z pracoŭnaj hrupy pa realizacyi Kancepcyi dziaržaŭnaj mihracyjnaj palityki. Hrupa, u jakuju ŭvachodziać pradstaŭniki roznych viedamstvaŭ i parłamientaryi, była stvorana ŭ sakaviku 2019 hoda rasparadžeńniem Uładzimira Pucina. Pierad joj staić zadača pryciahnuć u Rasiju jak maha bolš novych hramadzian — ad 5 da 10 miljonaŭ. Vyrašajuć jaje praź źmianieńnie mihracyjnych režymaŭ i refarmavańnie instytuta hramadzianstva.
U pres-słužbie ŭrada, kudy «Kamiersant» źviarnuŭsia z zapytam, paćvierdzili infarmacyju ab padrychtoŭcy takich źmienaŭ.
Va ŭradzie adznačyli, što praca nad zakonaprajektam zaviaršajecca, paśla ŭzhadnieńnia z administracyjaj prezidenta jon budzie nakiravany ŭ Dziarždumu. Tam jaho ŭžo čakajuć. «My chočam u viasnovuju siesiju hetaje pytańnie zakryć, kab usie achvotnyja mahli stać hramadzianami Rasii. Adpaviedna, Rasija što budzie rabić? Jana budzie svaich hramadzian abaraniać», — skazaŭ vice-śpikier nižniaj pałaty Piotr Tałstoj.
