Fota Nadziei Bužan
Litva prapanuje Biełarusi intensiŭna vykarystoŭvać jaje infrastrukturu dla naładžvańnia rehularnych pastavak nafty i hazu. Pra heta paviedamiŭ žurnalistam ministr zamiežnych spraŭ Litvy Linas Linkiavičus pa vynikach sustrečy z kiraŭnikom źniešniepalityčnaha viedamstva Biełarusi Uładzimiram Makiejem, pieradaje BIEŁTA.
«My hatovyja praciahvać praktyku alternatyŭnych pastavak nafty, jakija ŭžo prachodzili. My možam abmiarkoŭvać i bolš pastajanny praces. Pra heta jakraz kazałasia na sustrečy z premjer-ministram Biełarusi. My pavinny razhledzieć techničnyja rašeńni, mahčymaści pastavak hazu. Tut treba budzie vielmi šmat», — skazaŭ Linas Linkiavičus.
Jak paviedamlałasia, u suviazi z prypynieńniem pastavak nafty z Rasii z 1 studzienia 2020 hoda (baki nie dasiahnuli damoŭlenaściaŭ pa košcie), Biełaruś stała aktyŭna vieści pošuki alternatyŭnych krynic. Alaksandr Łukašenka zapatrabavaŭ ad urada dyviersifikavać pastaŭki nafty i imknucca pastaŭlać z rasiejskaha rynku 30-40% ad nieabchodnych abjomaŭ.
«Treba iści da taho, što 30-40% my budziem kuplać nafty ŭ Rasijskaj Fiederacyi. Pracentaŭ 30 my pavinny z Bałtyki zavozić i pracentaŭ 30 praz Ukrainu — pravierany ŭžo šlach. Mahčyma, Kazachstan zmoža pastavić nam naftu, kali Rasija pahodzicca z hetym. Dziŭna: naš sajuźnik nie daje zhody na pastaŭku nafty ad našaha inšaha sajuźnika. Što ž, takaja situacyja ciapier pa pastaŭkach nafty, i my pavinny ŭ hetym razabracca», — zajaŭlaŭ kiraŭnik dziaržavy.
