Zatym, kali haspadary źnikłaha kata i sabaki źviartajucca ŭ ŽKH, ich adpraŭlajuć u Minsk, kab zabirać nazad svajho hadavanca.
Dla čaho tak robicca, «Naša Niva» zapytałasia ŭ namieśnika načalnika Vałožynskaj ŽKH Paŭła Klemiankova:
«Takaja pracedura. My nie majem prava adłoŭlivać žyvioł, bo ŭ Vałožynie niama punktaŭ časovaha ŭtrymańnia žyvioł. A zabivać žyvioł my nie chočam, dy i nie majem na heta prava. Usie ž chočuć žyć. Tamu my zaklučyli damovu z «Faŭnaj horada», jany pryjazdžajuć i zabirajuć žyvioł. Minsk — heta najbližejšy da nas horad, dzie jość takaja pasłuha. Kali haspadar žyvioły znachodzicca, my nakiroŭvajem jaho ŭ Minsk. Tak, čałaviek vymušany sam zabirać svajho kata ci sabaku. Kali chočacie, heta takoje pakarańnie, što vypuskaje svaju žyviołu biez nahladu», — adkazaŭ Pavieł Klemiankoŭ.
Vyklik «Faŭny horada» kaštuje 76,65 rubla. Stolki płaciać arhanizacyi za hadzinu pracy śpiecyjalistaŭ. Plus transpartnyja raschody. Na sajcie «Faŭny horada» paviedamlajecca, što adzin kiłamietr kaštuje 1,22.
Značyć, daroha da Vałožyna i nazad kaštuje miascovamu ŽKH prykładna 200 rubloŭ.
Dyrektarka «Faŭny horada» Tamara Carykoŭskaja rastłumačyła «Našaj Nivie», što ŭ asnoŭnym «Faŭna horada» pracuje ŭ Minsku i Minskim rajonie:
«Kali arhanizacyja hatovaja apłacić transpartnyja pasłuhi, my budziem pracavać dzie zaŭhodna. Vałožyn, badaj, heta samy addaleny punkt na siońniašni dzień. U kožnym rajonnym horadzie pry ŽKH jość słužby adłovu žyvioł. Pytańnie tolki ŭ tym, što nie ŭsie majuć mahčymaść utrymlivać žyvioł abo razvozić ich pa tych haradach, dzie isnujuć punkty časovaha ŭtrymańnia. Tamu čaściej za ŭsio žyviołaŭ utylizujuć na miescach», — patłumačyła Tamara Carykoŭskaja.
