«Učorašnija zajavy Łukašenki ŭ Škłovie byli samaj kancentravanaj i davoli rezkaj dekłaracyjaj jaho pazicyi nakont kanfliktu z RF», — piša ŭ siabie ŭ telehram-kanale analityk Arciom Šrajbman.
«Pazicyja hetaja palahaje na tym, što Maskva ŭžo šmat hadoŭ padmanvaje Minsk, «kinuła pa hazie» i «pastaviła rakam» pa nafcie, usio — kab pahłynuć krainu, a jamu naŭzamien dać pasadu ŭ Rasii. Ale nie na taho napali, jon nie choča być apošnim prezidentam krainy, jon i kraina hatovyja žyć biadniej, ale nie pad bizunom, budziem adychodzić ad rasijskaj manapolii, navat kali pryjdziecca pierapłačvać.
Možacie nazvać mianie naiŭnym, ale ja dumaju, što heta bolš nie torh. Łukašenka albo pryniaŭ, što jak raniej bolš nie budzie, albo ŭžo blizki da hetaha pryniaćcia. Na videa jaho vystupu — absalutnaja pryrečanaść», — miarkuje Šrajbman.
«A kali Maskva praciahnie cisnuć, što dalej?
Prykładam, uviadzie abmiežavańni na biełaruskija pradukty, zojmie žorstkuju pazicyju na pieramovach pa canie na haz, — pytajecca Šrajbman. — Pa łohicy eskałacyi Minsk pavinien budzie adkazvać. Kazyroŭ zastałosia niašmat. Ja b padzialiŭ ich na dźvie hrupy — ciarpimyja i krajnija.
Ciarpimyja — heta toje, na što Minsk užo ŭ rozny čas išoŭ:
— sustrečnaje pałaskańnie ŭ hrazi rasijskaj ułady na svaim TB;
— stvareńnie prablem na miažy, uzmocnienyja pravierki, jak Łukašenka pryznaŭsia, jany ŭžo rabili ŭ minułym;
— bajkot intehracyjnych samitaŭ, vykarystańnie svajho staršynstva ŭ JEAES i ADKB dla tarpiedavańnia ich dziejnaści;
— vychad ź pieramovaŭ pa pahłybleńni intehracyi (de-fakta jany ŭžo na hłybokaj paŭzie);
— raptoŭnyja ramonty nafta-i hazapravodaŭ.
Usio heta jak kamar ukusiŭ pry ciapierašniaj hłybini zvadak, Rasija ad hetaha svaich pazicyj nie pamianiaje, a, chutčej, naadvarot, zrobić bolš žorstkimi, — miarkuje Šrajbman. — U kanfliktu siońnia takaja dynamika i pryncypovaść, što my možam, na ŭsieahulny podziŭ, praskočyć ŭsie raniejšyja stancyi i apynucca ŭ novaj dla historyi našych adnosin zonie eskałacyi.
Ja pakul nie liču hety scenar samym imaviernym (usio jašče spadziejučysia na chałodny rozum bakoŭ), ale ŭžo nie vyklučaju jaho. My pryjdziem tudy, kali vir kanfliktu zaciahnie ŭ siabie ŭvieś kompleks adnosin, uvieś handal — jak naftaj i hazam, tak i ŭsim astatnim», — ličyć analityk.
Biełaruski palitołah ličyć, što krajnimi krokami mohuć być nastupnyja:
— prypynieńnie siabroŭstva ŭ JEAES,
(nie ŭsie viedajuć, ale kali my dałučalisia da hetaha sajuza, my zapisali ŭ svaim zakonie ab ratyfikacyi pahadnieńnia ab JEAES zajavu ab tym, što budziem vykonvać svaje abaviazacielstvy, tolki kali ŭmovy handlu naftaj i hazam nie buduć horšać. A ciapier jany horšajuć.
Łukašenka ŭžo niekalki razoŭ namiakaŭ na hetuju mahčymaść svaimi «nachrana nam taki sajuz».
Nastupstvy takoha kroku — jašče bolš vialikija prablemy z dostupam na rasijski rynak, ale chto viedaje, nakolki vialikimi jany buduć da hetaha momantu.)
— Vyvad rasijskich vajskovych abjektaŭ.
(U 2020 hodzie minaje termin arendy dvuch vajennych abjektaŭ RF u Hancavičach i Vilejcy.
Nastupstvy — pačatak dehradacyi śviatoj karovy adnosin — vajskovaha sajuza. Rasiejskaja ŭłada budzie rabić vysnovy i ŭ adkaz abo ŭzmocnić cisk na Minsk da krajnaści, albo vyklučyć Biełaruś sa śpisu svaich nadziejnych vajennych płacdarmaŭ.
Apošniaje ŭžo pakrysie adbyvajecca — razhortvańnie vajskovych złučeńniaŭ kala biełaruskaj miažy, ale paśla vyhnańnia vajennych abjektaŭ heta nabudzie novy razmach. Nas pačnuć usimi siłami vyciskać ź sistemy zakupaŭ rasijskaha VPK.)
— Adklučeńnie rasijskich kanałaŭ.
— Zakryćcio miažy.
(Tut nahoda ŭžo jość, Maskva ŭzmacniła kantrol na miažy jašče ŭ 2016—17 hadach.)
— Re-nacyjanalizacyja «Biełtranshaza».
(Heta, badaj, samaja žorstkaja z dastupnych mier. Ryzyki scenara mała čym abmiežavanyja. Adciskańnie rasijskaj ułasnaści pryviadzie da sudovych pazovaŭ u mižnarodny arbitraž, adnabakovaha pierahladu abjomaŭ pastavak hazu i nafty ŭ Biełaruś, pierakidvańnia tranzitu rasijskich vuhlevadarodaŭ na inšyja kanały, spynieńnia lubych adterminovak pa kredytach, zvarotnaj eksprapryjacyi biełaruskaj ułasnaści ŭ Rasii.)
«Što z hetaha moža vytrymać biełaruskaja ekanomika i dziaržava? Dumaju, što šmat što moža, ale nie viedaju napeŭna. Nie viedaje i ŭłada. Hetaja niajasnaja stupień patencyjnaj uraźlivaści siońnia i jość hałoŭnaja zaruka taho, što pa šlachu maksimalnaj eskałacyi, prynamsi, Minsk nie pojdzie. Chutčej za ŭsio», — aściarožna prahnazuje Arciom Šrajbman.
