Na praciahu sutak rasijski bok zreahavaŭ na ŭsie asnoŭnyja pierahavornyja pytańni i krytyku Łukašenki, vykazanuju ŭ chodzie intervju dla «Echo Moskvy»: pra 31-ju intehracyjnuju darožnuju kartu, naftu i haz, — źviartaje ŭvahu palityčny analityk Andrej Jelisiejeŭ.
Choć Łukašenka faktyčna zajaviŭ, što Dźmitryj Miadźviedzieŭ nie ŭ kursie pazicyj prezidentaŭ i nie pa spravie lezie sa svajoj nienavisnaj darožnaj kartaj pra adzinuju valutu i nadnacyjanalnyja orhany, pres-sakratar Pucina Dźmitryj Piaskoŭ tut ža vydaŭ krasamoŭnaje abviaržeńnie: «Nie, tut my nie možam pahadzicca z Alaksandram Ryhoravičam, my nie ličym, što jość niejkaja roznaść u zajavach prezidenta i staršyni ŭrada».
Heta značyć, Pucin prytrymlivajecca toj ža pazicyi, što i Miadźviedzieŭ: paśla vykanańnia 30 darožnych kart pa ŭnifikacyi zakanadaŭstva praktyčna va ŭsich śfierach i zdačy padatkovaha suvierenitetu ad Minska čakajecca prasoŭvańnie pa finalnaj, 31-j, karcie, sa zdačaj manietarnaha suvierenitetu i pieratvareńniem u maryjanietkavuju dziaržavu.
Paviedamleńnie ŚMI ab tym, što 31-ja darožnaja karta moža być realizavanaja tolki ŭ 2023—2024 hadach — słaboje suciašeńnie dla Biełarusi, ličyć analityk, bo jana i nie moža startavać raniej za 2023-i, bo da hetaha času i zapłanavana vykanańnie pakieta z 30 darožnych kart.
Jak ličyć analityk Andrej Jelisiejeŭ, Łukašenka vydatna razumieje, što raz pytańnie pra 31-ju darožnuju kartu nie zdymajecca, to ŭviazvacca ŭ vykanańnie 30-i z unifikacyjaj zakanadaŭstva — niebiaśpiečnaja pastka. Ź inšaha boku, jon ža sam pryniaŭ hetuju hulniu hod nazad (dy naohuł 25 hadoŭ nazad), i voś tak prosta «saskočyć» biez surjoznych palityka-ekanamičnych nastupstvaŭ nie atrymajecca. Ale i «pahłyblenaja intehracyja» pa rasijskich praviłach ad hetych niaŭmolnych nastupstvaŭ nie ratuje.
Taksama analityk patłumačyŭ ciažkaści ŭ pieramovach krain pa hazavym pytańni. Sprava ŭ tym, što ŭ biudžet-2020 Minsk zakłaŭ canu na ŭzroŭni biahučaha hoda ($127 za 1000 kubamietraŭ). Kali Kreml padymie jaje da $152 (pra takija płany zhadvaŭ Łukašenka), to 20 młrd kuboŭ abyducca Biełarusi na $500 młn daražej — heta navat bolš, čym straty ad pavieličeńnia cany na naftu.
Pry hetym Miensk raźličvaŭ źnizić canu na 2020-y chacia b da $107 — mienavita takuju canu jon staŭ u adnabakovym paradku płacić za rasijski haz u 2016 hodzie, pakul pytańnie nie razrulili Pucin i Łukašenka na asabistaj sustrečy ŭ krasaviku 2017-ha praz schiemu z «pieramytnioŭkaj» 6 młn ton nafty, nahadvaje Jelisiejeŭ. U takim vypadku na zakupcy 20 młrd kuboŭ Minsk zekanomiŭ by $400 młn. Kali paličyć, to roźnica ŭ canie hazu na 2020-y pry roznych ŭjaŭleńniach Minska i Maskvy dasiahaje amal $1 młrd.
Što da pytańnia ab pastaŭkach nafty. Kiraŭnik «Transnafty» Mikałaj Tokaraŭ nazvaŭ pahrozy Łukašenki pierajści na reviersnyja pastaŭki «saudaŭskaj abo amierykanskaj nafty» praz Polšču palityčnymi, «bo pa ekanomicy jany nie prachodziać». Heta biezumoŭna tak, zaŭvažaje analityk Alaksiej Jelisiejeŭ i tłumačyć: nijakaj ekanamičnaj racyi pierapłačvać sotni miljonaŭ dalaraŭ za naftu ŭ Minska niama. Prynamsi, da toj pary, pakul Rasieja hatovaja pastaŭlać patrebnyja abjomy nafty biełaruskim NPZ, a Maskva heta pad sumnieŭ nie staviła, choć i nie padoŭžyła schiemu «pieramytnioŭki» 6 młn ton.
Letam biełaruski pasoł (i de fakta vice-premjer) Uładzimir Siamaška paskardziŭsia, što «my nie zmožam pieražyć [rasijski] padatkovy manieŭr», jaki praduhledžvaje pastupovaje padvyšeńnie cany na rasiejskuju naftu. Niajasna ŭ takim vypadku, jak Miensk źbirajecca pieražyć jašče bolš vysokija taryfy na traspartavańnie i canu saudaŭskaj nafty z sumarnaj roźnicaj koštu ŭ sotni miljonaŭ dalaraŭ, rezonna zaŭvažaje Jelisiejeŭ.
