«Tupaja p***a», «s*ka», «adstoj», «starucha» — voś takimi epitetami była ŭznaharodžana adna viadomaja piśmieńnica paśla adnaho svajho tvitu, apublikavanaha 19 śniežnia.
Dyk kaho heta tak abzyvali? Mabyć, niejkuju skandalnuju pop-zorku? Dy nie, takim čynam abzyvali słavutuju aŭtarku «Hary Potera» Džej Kej Roŭlinh, jakaja, biezumoŭna, źjaŭlajecca zorkaj, ale słavu zdabyła nie skandałami, a knihapisańniem.
Dyk chto jaje tak abzyvaŭ? Napeŭna, złosnyja žančynanienaviśniki, padbuchtoranyja pravymi papulistami, na chvali čarhovaha ŭzdymu suprać prahresu, śviatła i svabody?
Dy nie, aŭtarami hetych epitetaŭ byli jakraz «abaroncy prahresu, śviatła i svabody», heta značyć levalibieralnyja zmahary suprać hamafobii, transfobii, kvirfobii, aseksafobii ihd.
Dyk što ž tady takoje skazała aŭtarka «Hary Potera», što až tak raźjušyła zmaharoŭ za talerantnaść? Mabyć, u stanie niejkaha pamutnieńnia žorstka abraziła kahoś z šerahu LGBTQIA+. A moža, pabiła, pakalečyła?
Ničoha padobnaha. Sprava voś u čym. Jašče viasnoj, adna z ekśpiertak CGD, Maja Forstejter, u pryvatnym tvitary padkreślivała, što poł — heta bijałahičnaja katehoryja, maje tryvały charaktar i nie zaležyć ad subjektyŭnych adčuvańniaŭ. Padkreślim: havorka išła mienavita pra «poł» (sex), nie pra «hiendar».
Za hetyja tvity Maja Forstejter była zvolniena. Kali chto nie viedaŭ: nastojvańnie na bijałahičnaści połu — heta transfobija. Forstejter padała ŭ sud, ale sud padtrymaŭ rašeńnie pracadaŭcy, paznačyŭšy, što takim pohladam, jakija jana reprezientuje, «nie miesca ŭ demakratyčnym hramadstvie».
Voś u adkaz na rašeńnie suda i napisała svoj tvit słavutaja piśmieńnica. Ale — uvaha: jaki tvit? Abazvała transhiendaraŭ? Pryniziła abaroncaŭ ich pravoŭ? Zaklikała «dać adpor»?
Dy nie. Prosta ŭ formie pytańnia vyraziła sumnieŭ u pravilnaści karnych sankcyj u stasunku da Forstejter.
«Možacie apranacca, jak chočacie.
Nazyvajcie siabie, jak žadajecie.
Śpicie ź luboj paŭnaletniaj asobaj, jakaja zhodna na heta
…
Ale vyhaniać žančynu z pracy za śćvierdžańnie, što poł - heta niešta realnaje?»
Usio. Hetaha było dastatkova, kab zaličyć Roŭlinh da złosnych transfobak, jakija pahražajuć roŭnaści, svabodzie i prahresu. Dastatkova było zasumniavacca ŭ słušnaści karnych sankcyj da asoby, jakaja ŭ pryvatnym tvitary ćvierdzić, što poł — heta pryrodžanaja i niaźmiennaja charaktarystyka.
«Tupaja p***a», «s*ka», «starucha»… — syčeli adny. Jašče adna «TERF» — aburalisia druhija. TERF — śpiecyfičnaja etykietka, stvoranaja dla taho, kab pacyfikavać fieministak, jakija nie pahadžajucca z transhiendarnaj artadoksijaj. Heta etykietka maje takuju ž acenkavuju nahruzku i vykonvaje takuju ž funkcyju, što i «hamafobija» abo «transfobija».
Voś vam i talerantnaść.
