19 śniežnia papa rymski Francišak prysutničaŭ na cyrymonii adkryćcia na ścianie vatykanskaha Apostalskaha pałacu kryža z prymacavanaj da jaho ratavalnaj kamizelkaj u pamiać ab uciekačach. Tam pantyfik sustreŭsia ź biežancami, jakija niadaŭna prybyli humanitarnym kalidoram z hrečaskaha Lesbasa, paviedamlaje Vatican News.
Francišak zaŭvažyŭ, što nichto nie viedaje ni imia, ni pachodžańnia čałavieka, jakomu naležała kamizelka, vyklučna kaardynaty taho miesca ŭ mory, dzie jana była znojdziena.
Jon zaznačyŭ, što ŭ chryścijanskaj tradycyi kryž — heta simvał pakut i achviary, ale taksama adkupleńnia i zbaŭleńnia, simvał pieramohi Chrysta nad śmierciu.
«Taksama i nieviadomy mihrant, pamierły z nadziejaj na novaje žyćcio, udzielničaje ŭ hetaj pieramozie. Ratavalniki mnie raspaviali, što vučacca čałaviečnaści ad ludziej, jakich atrymlivajecca vyratavać. Jany padzialilisia sa mnoj, što padčas kožnaj misii pa-novamu adkryvajuć pryhažość byćcia adzinaj vialikaj čałaviečaj siamjoj, źjadnanaj u paŭsiudnym braterstvie», - padkreśliŭ Francišak.
Pantyfik zaznačyŭ, što vyrašyŭ źmiaścić u Vatykanie «ukryžavanuju» ratavalnuju kamizelku, kab pastajanna pamiatać pra maralny abaviazak ratavańnia kožnaha čałaviečaha žyćcia, jaki abjadnoŭvaje viernikaŭ i niavierujučych.
«Jak možam «prachodzić mima», jak śviatar i levit z prypavieści pra Dobraha Samaranina, stanoviačysia takim čynam suadkaznymi za ich śmierć. Naša biaździejnaść — heta hrech!» — śćvierdziŭ Francišak.
Francišak vykazaŭ padziaku ŭsim, chto biez vahańniaŭ ratuje mihrantaŭ.