Milicyja turbujecca, što siarod moładzi ŭsio bolšuju papularnaść nabyvajuć «upiski», abo «fłety». Heta viečarynki, jakija arhanizujucca praź śpiecyjalnyja hrupy ŭ sacsietkach absalutna nieznajomymi ludźmi. Niekalki dzion tamu ź ciažkimi cialesnymi paškodžańniami i špitalizacyjaj skončyłasia viečarynka na vulicy Kalinoŭskaha dla 23-hadovaha minčuka, paviedamlaje pres-słužba siłavoha viedamstva.
Kampanija maładych ludziej adpačyvała na tak zvanaj upiscy. Moładź z roznych rajonaŭ stalicy, uklučajučy niekalkich niepaŭnaletnich, baviła čas sa śpirtnym, ale ŭ vyniku roznahałośsi pieraraśli ŭ svarku. Vyśviatlać adnosiny praciahnuli na leśvičnaj placoŭcy. U vyniku ŭdaru ŭ śpinu adzin z chłopcaŭ upaŭ na leśvicu. Daktary paźniej dyjahnastavali pierałom čerapa, razryŭ piečani i inšyja ciažkija traŭmy. Zaviedziena kryminalnaja sprava.
— Modnyja siarod moładzi «ŭpiski i «fłety» patrabujuć našaj asablivaj uvahi. Hetyja viečaryny, jak praviła, arhanizujucca absalutna nieznajomymi ludźmi, pavodziny jakich mohuć być niepradkazalnymi. Źbirajucca jany praź śpiecyjalnyja hrupy ŭ sacsietkach. Takija jość u bolšaści haradoŭ. Naprykład, staličnaja fłet-hrupa maje zvyš 45 tysiač udzielnikaŭ, — adznačaje namieśnik načalnika adździeła arhanizacyi pracy inśpiekcyj pa spravach niepaŭnaletnich upraŭleńnia prafiłaktyki MUS Aleh Maksimaŭ.
Takija viečarynki prachodziać u kvaterach i katedžach z raśpićciom vialikaj kolkaści śpirtnoha, a ŭ asobnych vypadkach i ŭžyvańniem narkotykaŭ. Usio fatahrafujecca i raźmiaščajecca na staronkach udzielnikaŭ hrup. Asablivaj papularnaściu karystajucca kadry sa śpirtnym i ŭdzielnikami, jakija znachodziacca ŭ biezdapamožnym stanie. Jany stanoviacca abjektam kpinaŭ i ździekaŭ.
Akramia taho, na staronkach u padobnaha rodu hrupach źmiaščajucca prapanovy da ŭstupleńnia ŭ seksualnyja adnosiny. Čaściakom fatahrafii majuć eratyčny, a časam i parnahrafičny źmiest. A heta ŭžo kryminalna-karalnaja dzieja, hetym praduhledžana pakarańnie ŭ vyhladzie pazbaŭleńnia voli da čatyroch hadoŭ, — nahadvaje milicyja.
— Tamu chaciełasia b z adnaho boku pieraścierahčy padletkaŭ ad naviedvańnia padobnych viečarynak, uličvajučy ŭsie vyšejnazvanyja niuansy. Ź inšaha boku, baćki pavinny viedać, dzie i z kim bavić čas ich dzicia, asabliva nočču. I peŭna, varta naściarožycca, kali padletak źbirajecca na takoha rodu viečarynku, — padkreśliŭ pradstaŭnik MUS.
