Ziemfiru Hajnulinu zatrymali va Ufie ŭ kancy listapada. Jaje vinavaciać u saŭdzielnictvie ŭ zabojstvie 9-hadovaha Davida. Chłopčyka zabiŭ baćka, zasunuŭšy dziciaci klap u rot. Školnik zadychnuŭsia. Tamara — tak siabie nazyvaje žančyna — nibyta maliłasia nad ciełam chłopčyka, kab toj uvaskros, a potym dapamahła baćku schavać cieła ŭ lesaparku ŭ Čkałaŭskim rajonie. Ale na pytańni žurnalistaŭ, ci praŭda heta, Ziemfira pakazała žestam, što nie.
Leninski rajonny sud Jekaciarynburha abiraje mieru strymańnia ŭradžency Baškiryi Ziemfiry Hajnulinaj. Pasiadžeńnie prachodzić u zakrytym režymie, paviedamlaje karespandent 66.RU. Žančyna chavaje tvar ad kamier i nie adkazvaje na pytańni žurnalistaŭ. Jaje pytajuć, navošta jany zabili dzicia.
Fota: Luboŭ Šadyjeva, 66.RU
Da hetaha Leninski rajonny sud aryštavaŭ abvinavačvanaha ŭ zabojstvie 40-hadovaha Ivana Kazancava. Na pasiadžeńni vyśvietliłasia, što ŭ mužčyny dva hramadzianstvy — rasiejskaje i niamieckaje, u jaho dvoje synoŭ, adzin ź ich — zahinuły David. Mužčyna sudzimy, ale nie pamiataje za što.
Fota: Dźmitryj Antonienka, 66.RU
Na pytańni sudździ ab rodzie zaniatkaŭ Kazancaŭ adkazaŭ, što jon — «vučań Isusa Chrysta». Abvinavačany patłumačyŭ, što doma na ziamli ŭ jaho niama, jon vandroŭnik i daviaraje tolki Hospadu. Na pytańnie, ci varta zakryć pasiadžeńnie ad ŚMI, Ivan adkazaŭ, što «na ŭsio vola Božaja».
Dziŭnyja pavodziny Ivana tłumačacca prychilnaściu da relihii. Krynicy 66.RU śćviardžajuć, što na śvietapohlad mužčyny surjozna paŭpłyvaŭ jaho baćka — adept siekty «Śviedki Ijehovy», zabaronienaj u Rasii. Jany štodnia sazvońvalisia i padoŭhu havaryli pra Boha. Sam Ivan uvachodziŭ u supolnaść «Vučni Chrysta», arhanizavanuju ŭradženkaj Baškiryi Ziemfiraj Hajnulinaj.
Śledstva chadajničała ab zaklučeńni Ivana Kazancava pad vartu. Jaho aryštavali da 26 studzienia, paviedamili 66.RU u pres-słužbie.
Ivana Kazancava abvinavačvajuć u zabojstvie syna Davida. U zahinułaha, jak i ŭ jaho baćki, padvojnaje hramadzianstva Rasii i Hiermanii. Maci chłopčyka — hramadzianka Biełarusi. Dakładny ŭzrost zabitaha nieviadomy: pa adnoj infarmacyi, Davidu było 9 hadoŭ.
Złačynstva adbyłosia ŭ Jekaciarynburhu ŭ kancy kastryčnika abo pačatku listapada — dadzienyja pra heta taksama pakul adroźnivajucca.
Zabojstva adbyłosia ŭ kvatery na Druhasčormiet, dzie žyła siamja. Tam vyjavili bizun i Bibliju. Dzicia pamierła ad aśfiksii — u jaho ŭ rocie byŭ klap. Krynicy nazyvajuć dźvie viersii zdareńnia: pa adnoj ź ich, baćki dziciaci — siektanty, jakija pravodzili rytuał pa vyhnańni demanaŭ. Pa druhoj — jany radykalnyja vierniki, jakija rehularna bili syna rozhami ŭ jakaści pakarańnia. Padčas adnaho ź ich chłopčyk zadychnuŭsia.
Cieła chłopčyka vyjavili 27 listapada paśla ananimnaha zvanka na telefonnuju liniju dziažurnaj častki «Dzicia ŭ niebiaśpiecy». Trup dziciaci byŭ zahornuty ŭ praścinu i zakapany. «Pryčynaj śmierci dziciaci źjaviłasia miechaničnaja aśfiksija ad zakryćcia dychalnych šlachoŭ», — havorycca ŭ paviedamleńni SK.
Amal praź miesiac paśla zabojstva baćku chłopčyka zatrymali va Ufie na čyhunačnym vakzale. «Hramadzianin mieŭ namier schavacca ŭ inšym rehijonie», — udakładnili ŭ palicyi. U tym ža horadzie zatrymali i Ziemfiru Hajnulinu.
Maci Davida paśla zdareńnia źjechała ŭ Biełaruś, ale zatym viarnułasia ŭ Rasiju i sama pryjšła na dopyt da śledčych.
«Pa vynikach pieršapačatkovych mierapryjemstvaŭ papiarednie ŭstanoŭlena, što mužčyna raspraviŭsia sa svaim synam u suviazi z uźnikłaj asabistaj niepryjaznaściu», — kamientuje Śledčy kamitet pryčyny trahiedyi. Ivanu Kazancavu pradjavili abvinavačańnie ŭ zabojstvie.
Paśla zabojstva Ziemfira Hajnulina, jakaja nazyvaje siabie Tamaraj, nibyta dva dni maliłasia nad ciełam dziciaci ŭ nadziei ažyvić jaho. Cudu nie adbyłosia, i cieła chłopčyka vyrašyli schavać u Paŭdniova-Zachodnim lesaparku. U sudzie žančyna admaŭlała, što sprabavała ažyvić chłopčyka.
