Adrazu niekalki rasijskich ŚMI paviedamili pra žudasnaje zabojstva ŭ Jekaciarynburhu. Achviaraj staŭ maleńki chłopčyk, u zabojstvie padazrajuć jaho maci, hramadzianku Biełarusi, i baćku.
28 listapada ŭ adnym z parkaŭ horada znajšli cieła 9-hadovaha chłopčyka.
Park, dzie nibyta znajšli trup chłopčyka
«Dzicia bili bizunami, a potym zasunuli ŭ rot klap. Paśla hetaha cieła zakapali na terytoryi lesaparku.
Pa papiarednich dadzienych, dzicia zabili na «relihijnaj hlebie». Pry pieratrusie ŭ kvatery była znojdzienaja Biblija. Pa adnoj ź viersij, dzicia bili bizunami, kab «vyhnać ź jaho demanaŭ», — raspaviadaje krynica ŭ siłavych strukturach. — Ale samaje strašnaje, što va ŭsim hetym rytuale ŭdzielničali baćki dziciaci. Pa adnoj ź viersij, u raspravie ŭdzielničaŭ baćka dziciaci. Mahčyma, dziejničała siekta. Pa inšaj — chłopčyka zabiła rodnaja maci», — paviedamlaje «KP-Jekaciarynburh» sa spasyłkaj na krynicy ŭ pravaachoŭnych orhanach.
Paviedamlajecca, što baćka dziciaci i jaho saŭdzielniki ciapier znachodziacca ŭ Jekaciarynburhu, ich zatrymali. A voś maci chłopčyka, hramadzianka Biełarusi, nibyta źbiehła na radzimu.
Praŭda, jekaciarynburhskija siłaviki pakul nie paćvierdzili hetuju historyju miascovym ŚMI.
«Naša Niva» źviarnułasia ŭ biełaruski Śledčy kamitet i pres-słužbu MUS. Tam pakul što nie vałodajuć infarmacyjaj.
U adździaleńni pasolstva Biełarusi ŭ Jekaciarynburhu adkazali, što pakul nie mohuć paćvierdzić, ci sapraŭdy zahinuły chłopčyk i jaho maci majuć biełaruskaje hramadzianstva.
«My viedajem pra hety vypadak tolki sa ŚMI. Pasolstva nakiravała zapyt u palicyju, čakajem adkaz», — paviedamiŭ «Našaj Nivie» kiraŭnik adździaleńnia biełaruskaha pasolstva ŭ Jekaciarynburhu Vasil Kunski.
