Rasśledavańnie ispanskaha suda ab umiašańni rasijskich śpiecsłužbaŭ u padziei vakoł sproby abviaščeńnia niezaležnaści Katałonii tyčycca dziejnaści hramadzianina Ukrainy i hramadzianina Rasii, aryštavanych letaś 4 kastryčnika ŭ pravincyi Žyrona, piša El Mundo.
Mužčyn zatrymali, kali jany jechali pa trasie AP-7 u napramku Francyi na zarehistravanym u Biełarusi «Mersedesie». Pradstaŭniki cyvilnaj hvardyi pry ahladzie aŭto vyjavili rasijskuju hranatu M-75, jakaja «była ŭ idealnym stanie».
Nacyjanalny sud źviazvaje abodvuch zatrymanych, na adnaho ź jakich jość order na aryšt, ale pad inšaj asobaj, sa staršym aficeram rasijskaj vajennaj raźviedki Dzianisam Siarhiejevym, u dačynieńni da jakoha taksama viadziecca rasśledavańnie.
Śledčyja Bellingcat vyśvietlili, što Siarhiejeŭ naviedvaŭ Barsiełonu minimum dva razy pad imiem Siarhieja Fiadotava, adzin raz — za try dni da refierendumu ab niezaležnaści Katałonii.
«Fiadotava» nazyvajuć słužboŭcam elitnaha vajskovaha padraździaleńnia 29155, jakoje zachodnija śpiecsłužby nieadnarazova abvinavačvali ŭ destabilizacyi ŭ Jeŭropie.
Hetaja hrupa rasijskaj vajskovaj raźviedki pačała kampjutarnyja napady napiaredadni refierendumu ŭ Katałonii, śćviardžajecca ŭ publikacyi.
Śledčyja nie vyklučajuć, što isnujuć suviazi pamiž lidarami katałonskich sieparatystaŭ i rasijskimi špijonami.
