13 listapada stała viadoma pra prymusovaje hałasavańnie ŭ miedycynskim kaledžy. Kuratarka pahražała zanizić bał, adpravić u Astraviec ci pieravieści ŭ hrupu da turkmienaŭ. Prymušajuć hałasavać i ludziej na dziaržaŭnaj pracy, piša Hrodna.life.
— Na učastkach 51-j akruhi byli zafiksavanyja vypadki prymusu da hałasavańnia. Na 12-m učastku, dzie znachodzicca internat miedkaledža, kuratarka chadziła pa internacie, časam navat ź milicyjantam, i prymušała studentaŭ chadzić i hałasavać daterminova. Jana pahražała tym, što moža zanizić im bał pry raźmierkavańni. Pahražała paśla vučoby adpravić u Astraviec. I jašče adzin varyjant zapužvańnia — studenta abiacali pieravieści ŭ «mienš prestyžnuju hrupu», dzie navučajucca turkmieny, — kaža Siarhiej Vieramiejenka, kaardynatar kampanii «Prava vybaru» ŭ Hrodnie.
Fota: harodniaspring.org.
Pra heta śviedčyli sami studenty. Majecca aŭdyjazapis razmovy. Niejkich bonusaŭ ci vychadnych za hałasavańnie im nie abiacali — prosta pahražali.
Ciaham amal hadziny pryjšło hałasavać 120 studentaŭ. Jany prychodzili na ŭčastak u chatnich tapkach, šortach. Ahulnaja kolkaść vybarščykaŭ na učastku — kala 2000. Naziralniki płanujuć nakiravać zvarot u prakuraturu.
— Na 11-m učastku dźvie vybarščycy skardzilisia na toje, što na pracy ich litaralna hnali na vybarčy ŭčastak. Jany pra heta skazali čalcam kamisii, ale tyja na heta nijak nie adreahavali. Jość videadokazy ich śviedčańniaŭ, — kaža Siarhiej.
Pa ŭsich vypadkach byli napisany skarhi va ŭčastkovuju kamisiju. Jość parušeńni i na inšych učastkach. Na ŭčastku №9 da Siarhieja hruba stavilisia, šantažavali, prymušali rehistravacca jak naziralnika, chacia davieranaj asobie kandydata, jakoj źjaŭlajecca Siarhiej, heta nie patrebna, nie addavali paśviedčańnie.
Ci jość prymusovaje hałasavańnie ŭ HrDU imia Janki Kupały? Tam znachodzicca vybarčy ŭčastak №14. Jak paviedamiŭ naziralnik, za dva dni prahałasavała 120 čałaviek, ź ich tolki pryblizna 20 — miascovyja žychary. Astatnija — inšaharodnija studenty, jakija majuć rehistracyju pa adrasie hałoŭnaha korpusa ŭniviersiteta. Naohuł, na učastku kala 1800 vybarščykaŭ, ź ich kala 700 — studenty.
— U pieršy dzień pryjšła studentka sa słovami «Mnie tut skazali prahałasavać…». Kamisija adrazu spytała: «A vy sami nie chočacie?», — raskazvaje naziralnik.
Studenty fiztecha, matfaka i FHKiTa skazali, što razmovaŭ i prośbaŭ pra daterminovaje hałasavańnie nie było. Jość śviedčańni, što prymušajuć hałasavać supracoŭnikaŭ univiersiteta.
Členy kamisii tłumačać vysokuju aktyŭnaść studentaŭ žadańniem prajavić hramadzianskuju pazicyju. A taksama tym, što znachodziačysia va ŭniviersitecie, zručniej pajści prahałasavać, a na vychadnyja možna pajechać damoŭ. Taksama tłumačać daterminovaje hałasavańnie tym, što 17 listapada, u asnoŭny dzień vybaraŭ, — Dzień studenta. Tyja, chto hałasuje ŭpieršyniu, atrymlivajuć kalendary ci błaknoty ŭ padarunak. Taksama šmat uvahi ad dziaržaŭnych ŚMI z pytańniami pra hramadzianskuju pazicyju. «Niekatoryja niekalki chvilin stajać pierad płakatam ź bijahrafijami kandydataŭ — vidać, bačać ich upieršyniu».
— Ja dumaju, što prymusovaje daterminovaje hałasavańnie robicca dla taho, kab zabiaśpiečyć jaŭku. Naturalna, što ŭ subotu ci niadzielu bolšaść ludziej zachoča adpačyć, schadzić kudy-niebudź, a nie na vybarčy ŭčastak. Inšaharodnija studenty pajeduć dachaty. Padčas asnoŭnaha dnia hałasavańnia niama takoha vialikaha natoŭpu. Tamu ludziej nahaniajuć zaranioj, — ličyć Siarhiej.
