Alaksandr Łukašenka ŭ Vienie 12 listapada ŭziaŭ udzieł u rabocie aŭstryjska-biełaruskaha biznes-forumu. U svaim vystupie kiraŭnik dziaržavy ahučyŭ nie tolki važnyja dla biznesmienaŭ pasyły, ale i adkryta vykazaŭsia pa šerahu nadzionnych suśvietnych prablem i hieapalityčnych pytańniaŭ.
Alaksandr Łukašenka prama skazaŭ pradstaŭnikam biznesu: «Kali vy, pryjšoŭšy da nas ź inviestycyjami, budziecie pracavać i stavicca da biełarusaŭ tak, jak da aŭstryjcaŭ, vy zaŭsiody budziecie maimi ludźmi, maimi hramadzianami, i ja vas budu padtrymlivać usialak, navat uzbrojenym šlacham. Ja heta skazaŭ absalutna ščyra», — padkreśliŭ biełaruski lidar.
Łukašenka rastłumačyŭ, što bačyŭ roznych biznesmienaŭ. Adny prychodziać, kab kuš sarvać, inšyja, kab, «myškujučy», niešta zarabić. A trecija nie tolki kab zarabić, ale i prynieści karyść narodu dziaržavy, dzie jany pracujuć. «Voś z trecimi my budziem pracavać chutka, apieratyŭna, budziem vas padtrymlivać», — skazaŭ Alaksandr Łukašenka.
Jon dadaŭ, što, kali niejkamu prajektu patrebna piersanalnaja padtrymka, u Biełarusi jość takaja praktyka. «Mianie tut mnohija žurnalisty, palityki paprakali: dy ŭ vas aŭtarytaryzm, dyktatura… Ja im adrazu kažu: vy ŭ biznesmienaŭ svaich spytajecie, ich hetaja dyktatura ŭ Biełarusi zadavalniaje? Kali zadavalniaje, to ja budu aryjentavacca na ich!» — skazaŭ Łukašenka.
«Što zajmacca bałbatańniem i kazać pra niejkuju demakratyju. Praŭda, ja taksama siońnia skazaŭ palitykam u Aŭstryi (nie stolki Aŭstryi, kolki ŭsim na Zachadzie, chto mianie sprabuje krytykavać): hladzicie, kab vam z časam nie pryjšłosia vučycca demakratyi ŭ Biełarusi. Tamu što my bačym, jakija pracesy adbyvajucca», — skazaŭ Łukašenka.
Jon pryvioŭ u jakaści prykładu prablemu nielehalnaj mihracyi. «U epochu hłabalizmu z hetym zmahacca vielmi składana. I hladzicie, kab vaša demakratyja vas ža nie pachavała. Ja hetaha nie chaču. Ja heta kažu vam, jak siabram. I pierš čym krytykavać kahości, treba razabracca ŭ situacyi, jakaja składvajecca ŭ toj ci inšaj krainie», — padkreśliŭ kiraŭnik Biełarusi.
Alaksandr Łukašenka adznačyŭ, što kali b u Biełarusi 20 ź lišnim hadoŭ tamu nie ŭstalavali viertykal ułady i nie abjadnali nacyju, to takoj krainy ŭžo b nie isnavała.
