Brescki abłasny sud 31 kastryčnika abviaściŭ prysud pa kryminalnaj spravie ŭ dačynieńni da Jułduz Ch., jakaja abvinavačvajecca ŭ zabojstvie svajoj novanarodžanaj dački, piša Bresckaja hazieta.
Žančynu pryznali vinavataj. Joj pryznačana pakarańnie ŭ vyhladzie 12 hadoŭ pazbaŭleńnia voli ŭ kałonii ahulnaha režymu. Taksama ź jaje ŭ dachod dziaržavy buduć spahnanyja pracesualnyja vydatki — amal 765 rubloŭ.
Nahadajem, sioleta ŭ mai na bierazie vadajoma ŭ Breście znajšli cieła dziaŭčynki, zahornutaje ŭ praścinu. Zaviali kryminalnuju spravu, pa padazreńni ŭ zabojstvie zatrymali maci dziciaci, hramadzianku Turkmienistana Jułduz Ch.
Jak vyśvietliła śledstva, 17 sakavika žančyna naradziła niedanošanuju dziaŭčynku, 10 maja dzicia vypisali z balnicy. Ale maci, nie žadajučy vykonvać baćkoŭskija abaviazki, u kvatery svajho znajomaha pierakryła dychalnyja šlachi dziaŭčynki, z-za čaho dzicia pamierła. Kab utaić złačynstva, maci schavała cieła ŭ jamie na bierazie vadajoma.
