Urady i ministerstvy Biełarusi i Rasii pracujuć nad intehracyjnymi dakumientami, kab za listapad pradstavić vyniki pracy kiraŭnikam dziaržaŭ, adnak zblizić pazicyi nie tak prosta. Pra heta zajaviŭ premjer-ministr Biełarusi Siarhiej Rumas siońnia na sustrečy sa staršynioj Padlikovaj pałaty RF Alaksiejem Kudrynym, pieradaje BiełTA.
«Praca niaprostaja, bo za hety čas, na žal, ekanomiki krain raźvivalisia pa roznych trekach, i siońnia niejak zblizić pazicyi, akazvajecca, nie tak prosta. Jość adčuvalnyja pytańni dla biełaruskaha boku, jakija my chočam u pieršuju čarhu vyrašyć na hetym intehracyjnym treku. Jość pytańni, jakija rasijski bok stavić u pieršuju čarhu, a jany časam nie supadajuć (ź biełaruskaj pazicyjaj). Tamu ciapier ministerstvy, urady robiać vialikuju pracu, kab za listapad kančatkova pradstavić kiraŭnikam dziaržaŭ toje, što ŭ nas atrymałasia», — skazaŭ Siarhiej Rumas.
«My vielmi aktyŭna ciapier pracujem nad prahramaj dziejańniaŭ (pa vykanańni sajuznaj damovy). My chočam udychnuć novyja siły ŭ naš dahavor ab Sajuznaj dziaržavie i rušyć napierad pa šlachu intehracyi pa ŭsich praktyčna ekanamičnych napramkach», - skazaŭ Siarhiej Rumas.
Jon nahadaŭ, što ciapier ministerstva dapracoŭvajuć 31 darožnuju kartu, jakaja zakranaje praktyčna ŭsie siektara ekanomiki.
Alaksiej Kudryn pahadziŭsia, što staić zadača udychnuć novaje žyćcio, novyja siły ŭ pracu Sajuznaj dziaržavy i sajuznyja damovy. «Adpaviedna, i my hatovyja vykazać svoj pohlad na hetyja mety. U vyniku takoha analizu chočam nie tolki vyjavić niejkija składanaści i ryzyki, ale i zrabić prapanovy», — dadaŭ jon.
