Sakretnaja słužba ZŠA dapytvała repiera Eminiema z-za pieśni z «pahroźlivym» tekstam u adras dački prezidenta krainy Ivanki Tramp. Dakumienty, atrymanyja Buzzfeed, śviedčać ab tym, što ahienty słužby razmaŭlali z repieram ab jaho pieśni Framed, piša Bi-bi-si.
U hetaj pieśni Eminem (sapraŭdnaje imia Maršał Meters) zhadvaje pra toje, što Ivanka Tramp znachodzicca ŭ bahažniku jaho mašyny, paśla čaho «durnaja maleńkaja bialavaja dziaŭčynka» akazvajecca «kinutaj u sažałku».
Supracoŭniki sakretnaj słužby abmiežavalisia adnoj razmovaj z Metersam — dalejšaha raźvićcia heta sprava nie atrymała.
Pavodle dakumientaŭ, na jakija spasyłajecca Buzzfeed, rasśledavańnie było adkryta paśla taho, jak u Sakretnuju słužbu na hetuju pieśniu paskardziŭsia «zakłapočany hramadzianin».
Hetym čałaviekam apynuŭsia žurnalist vydańnia TMZ, jaki ŭ rečaisnaści źviartaŭsia ŭ słužbu pa kamientar.
«Ja chacieŭ by daviedacca, ci viadzie słužba rasśledavańnie ŭ dačynieńni da Eminiema z-za pahroźlivaj pieśni pra Ivanku Tramp», — kazałasia ŭ jaho zapycie ŭ Sakretnuju słužbu.
Paśla hetaha słužba pačała vyvučać repiera — u dakumientach u pryvatnaści adznačana jaho mianuška Ślim Šejdzi
Ahienty źviazalisia ź jaho advakatami ŭ kancy 2017 hoda, a dopyt adbyŭsia ŭ studzieni 2018 hoda.
U chodzie dopytu ahienty cytavali inšy pryśviečany Trampu frystajł, ź jakim Eminiem vystupiŭ na adnoj z cyrymonij uznaharodžańniaŭ. Repier uspomniŭ toj tekst i pačaŭ začytvać jaho adnačasova z supracoŭnikami Sakretnaj słužby, havorycca ŭ dakumientach.
Dvuma dniami paźniej dopyt Eminiema abmiarkoŭvali na naradzie ŭ Sakretnaj słužbie, dzie było pryniata rašeńnie nie nakiroŭvać spravu prakuroru.